काठमाडौँ । प्रमुख प्रतिपक्ष दल नेपाली कांग्रेसका केन्द्रीय सदस्य गगन कुमार थापाले कम्युनिष्ट पार्टीहरु जतिसक्दो चाँडो जुटे पनि फुटे पनि निस्कर्षमा आउनुपर्ने बताएका छन् ।

कम्युनिष्ट पार्टीकै कारण देश बन्धक भइरहेको भन्दै उनले कम्युनिष्ट पार्टीले जतिसक्दो चाँडो झगडा मिलाएर देशलाई निकास दिनुपर्ने बताए ।

शनिबार कांग्रेस तीनपाटन गाउँपालिका सिन्धुलीद्वारा आयोजित आमसभालाई सम्बोधन गर्दै पूर्वमन्त्रीसमेत रहेका थापाले पाँच वर्ष कांग्रेसलाई जनताले सरकारमा बस्ने म्यान्डेड नदिएको बताए । उनले प्रतिपक्षमा बसेको कांग्रेस प्रतिपक्षमै बस्ने देशलाई निकास दिन सक्नेगरी मात्रै कांग्रेस अगाडि बढ्ने बताए ।

‘हामी सरकारमा जाने हो तर अहिले होइन, अब आउने चुनावमा सानका साथ जाने हो । कम्युनिष्ट सरकारले छोडेको भाग मात्र होइन आफैंले निर्माण गरेर हो । तपाईहरू नअलमलिनुस् देश निर्वाचनमा गयो । हामीले पहिलेनै भनेका हौं, प्रधानमन्त्रीले पुस ५ गते सदन विघटन गरेसँगै देश निर्वाचनमा गयो तर अदालतले प्रधानमन्त्रीकै सिफारिसलाई सदर गरेको भए न संसद् रहन्थ्यो न त चुनाव हुन्थ्यो तर अब चुनाव हुन्छ । अब संविधानको ट्र्याकबाट चुनावमा जान्छ, विधिले जान्छ ।’ उनले कांग्रेसले सरकार चलाउने म्यान्डेड नपाएको र कम्युनिस्टसँग सरकार चलाउने क्षमता नभएको बताए ।

सर्वोच्चअदालतले देशलाई न्याय दिएको भन्दै न्यायाधीश र पूर्वन्यायाधीशलाई सम्मान गर्ने बताए । अहिलेको अवस्थामा नेपालको कम्युनिष्ट पार्टी छ भन्ने अवस्था जनतालाई नभएको बताए ।

कार्यक्रममा बोल्दै थापाले नेकपाको दुवैसमूहलाई कांग्रेसले निकास दिने बताए ।