काठमाडौं । गोलरहित खेल खेलेको नेपाल थ्री नेसन्सकपको फाइनलमा पुगेको छ ।
प्रतियोगिताको अन्तिम लिगमा आज भएको खेलमा नेपाल र बंगलादेशले ०–० खेलेको हो । नेपालले बंगलादेशविरुद्धको यस प्रतिस्पर्धासँगै पछिल्ला छ खेलमा गोल गर्न सकेको छैन ।
नेपाल बंगलादेशविरुद्धका लगातार पछिल्ला तीन खेलमा पनि गोल गर्न असफल रहेको छ । नेपालले किर्गिस्तान यू–२३ टिमविरुद्ध पनि गोलरहित बराबरी खेलेको थियो ।
आजको बराबरी खेलसँगै नेपाल दुई अंकमा दोस्रो स्थानमा रहेर फाइनल पुग्यो । बंगलादेश भने चार अंकमा शीर्ष स्थानमा छ ।
बंगलादेशले यसअघि नै फाइनल यात्रा तय गरिसकेको थियो । उसले पहिलो खेलमा किर्गिस्तानलाई हराएको थियो ।
किर्गिस्तान भने दुई खेलबाट एक अंकमै सीमित रह्यो र प्रतियोगिताका तीन टिममध्ये अन्तिम स्थानमा रहेर बाहिरियो ।
अब नेपाल र बंगलादेशबीच उपाधिका लागि सोमबार भिडन्त हुनेछ ।
नेपालले अन्तिम पटक विश्वकप छनोटमा चिनियाँ ताइपेयीविरुद्ध दुई गोल गरेको थियो । त्यसको ६२ औं मिनेटमा अञ्जन विष्टले गोल गरेका थिए र त्यसयता लगातार ५ सय ६८ मिनेटको खेलमा नेपालले कुनै गोल गर्न सकेको छैन ।
Leave a Reply