काठमाडौं । प्रधानमन्त्री समेत रहेका नेकपा एमालेका अध्यक्ष केपी शर्मा ओली र नेता माधवकुमार नेपालबीचको भेटवार्ता सकिएको छ ।

पार्टीको आन्तरिक विवाद उत्कर्षमा पुगिरहेको बेला ३७ दिनपछि प्रधानमन्त्री तथा पार्टी अध्यक्ष ओली र नेता नेपालबीच भेटवार्ता भएको हो ।

यसअघि दुई नेताबीच चैत २ गते आमने सामने भएको थियो । चैत २ गते धुम्बाराहीमा समूहिक वार्ता भएको थियो।

ओली र नेपालबीच बुधबार साँझ नक्सालस्थित होटल मेरिटमा भेटवार्त भएको हो ।

स्रोतका अनुसार नेपालका विश्वासपात्र बनेका सचिव योगेश भट्टराईले प्रधानमन्त्री तथा अध्यक्ष ओलीलाई भेट गराएका हुन् ।

दुवै नेताबीच पार्टीभित्रको जारी विवादबारे छलफल भएको बताइएपनि छलफलको विषय भने सार्वजनिक गरिएको छैन ।

छलफलमा पहिले महासचिव विष्णु पौडेल ओलीसँगै गएको भए पनि उनी केही बेरमै निस्किएपछि ओली र नेपालबीच वान टु वाट बार्ता भएको थियो ।

छलफलपछि होटलबाट बाहिरिँदै गर्दा नेता नेपालले तत्काल केही नबोल्ने प्रतिक्रिया दिएपनि दुई नेताको हाउभाउले भने विवाद समाधान गर्ने दिशा उन्मुख भएको छ ।

दुवै नेता बैठकस्थलबाट प्रफुल्ल मुद्रामा बाहिरिएका थिए । त्यसैले पनि एमले नेताहरुले नै वार्ता सकारात्मक भएको अनुमान लगाएका छन् ।

ओलीका आर्थिक सल्लाहकार मोतीलाल दुगडले सञ्चारकर्मीसँग प्रतिक्रिया दिंदै दुवै नेता हँसिलो देखिनु भएकले वार्ता सकारात्मक भएको रुपमा बुझ्न सकिने बताए ।

ओलीले नेपालसहित ३२ जना सांसदलाई कारबाही गरेपछि एमाले फुटको संघारमा पुगेका बेला ओली नेपालबीच वार्ता भएको हो। महिना दिन लामो संवादहिनता पछि दुई नेताबीच वार्ता भएको हो।