काठमाडौँ । नेपाली कांग्रेसका सभापति शेरबहादुर देउवाले राष्ट्रपति र प्रधानमन्त्रीकै संस्कार गणतन्त्र सुहाउँदो नभएको आरोप लगाएका छन् ।

गणतन्त्र दिवसको अवसरमा शुभकामना दिँदै देउवाले कुनै पनि राज्य प्रणालीको सफलता त्यसको नेतृत्व गर्ने शासकको चरित्र र व्यवहारमा निर्भर हुने बताए ।

‘देशको राष्ट्रपति र प्रधानमन्त्रीकै संस्कार र व्यवहार तदनुकूलको बन्न नसक्दा त्यसको दुष्परिणाम देशले भोग्नुपर्ने हुन्छ र आज हामी त्यो भोगिरहेका छौँ । अतः गणतन्त्र दिवसको यो मितिमा यसप्रति गम्भीरता राख्न र यो चुनौती पार गरेर अघि बढ्ने सङ्कल्प गर्न म समस्त नेपालीमा अपिल गर्दछु’ देउवाले भने ।

लोकतन्त्रको स्थापना र पुनर्स्थापनाका लागि ऐतिहासिक जनआन्दोलनहरुमा आफ्नो जीवन उत्सर्ग गर्नुहुने ज्ञातअज्ञात सबै वीर सहिदप्रति उच्च सम्मानका साथ श्रद्धाञ्जली अर्पण गर्दै देउवाले संविधानको संरक्षण र सङ्घीय लोकतान्त्रिक गणतन्त्रात्मक शासन व्यवस्थाको संस्थागत विकास गरेर देशलाई आर्थिक समृद्धिको मार्गमा अग्रसर गराउनुपर्ने बताए ।

सभापति देउवाले कोरोनाको महामारीका कारण देशले कठिन र संवेदनशील परिस्थितिको सामना गरिरहेको अवस्थामा नागरिकको जीवनप्रति सरकार सर्वथा उदासिन र संवेदनहीन देखिएको आरोप लगाए ।