एजेन्सी । युरोकप फुटबलअन्तर्गत शनिबार राति भएको खेलमा बेल्जियम विजयी भएको छ ।

समूह बी मा रहेको बेल्जियमले रुसलाई ३–० गोलले पराजित गरेको हो । बेल्जियमका लागि रामेलु लुकाकुले दुई तथा थोमस मनुयरले एक गोल गरे । लुकाकुले खेलको १०औँ मिनेटमा गोल गरेका थिए । उनले सो गोल आफ्ना साथी डेनमार्कका क्रिष्टियन एरिक्सनप्रति समर्पित गरे ।

लुकाकु र एरिक्सनले इन्टर मिलानमा एकसाथ खेल्ने गरेका छन् । एरिक्सनको घटनाले आफू स्तब्ध भएको बताउँदै लुकाकुले उनको शीघ्र स्वास्थ्य लाभको कामना गरेका छन् ।

गोल गरेलगत्तै लुकाकुले एरिक्सनको श्वास्थ्य लाभका लागि मैदानमै कामना गरेका थिए । फिनल्याण्डसँगको खेलमा मैदानमै बेहोस भएर लडेका एरिक्सनको हाल उपचार जारी छ । उनको स्वास्थ्य अवस्था स्थिर तथा सुधारोन्मुख रहेको बताइएको छ ।

बेल्जियमका लागि खेलको ३४ औँ मिनेटमा मनुयरले तथा लुकाकुले ८८ औँ मिनेटमा व्यक्तिगत दोस्रो गोल गरेका थिए ।