Online Nepal
  • शुक्रबार, १६ चैत्र २०८०
  • भोजमा खान बनाउन बोलाएर साथीको हत्या, प्रहरीलाई नै चुनौति दिने मियाँ सात महिनापछि यसरी परे फन्दामा

    भोजमा खान बनाउन बोलाएर साथीको हत्या, प्रहरीलाई नै चुनौति दिने मियाँ सात महिनापछि यसरी परे फन्दामा

    अनलाइन नेपाल
  • शनिबार, २४ बैशाख २०७९
  • 1.5K
    SHARES

    सप्तरी । भोजमा खाना बनाउने वहानमा साथीलाई बोलाएर हत्या गरी फरार भएका सप्तरीको रुपनी गाउँपालिका–१ रुपनीचोक बस्ने ३८ वर्षीय मोनाजिर मियाँ पक्राउ परेका छन्।

    जिल्ला प्रहरी कार्यालयले पत्रकार सम्मेलन गरी पक्राउ परेका मियाँलाई आज सार्वजनिक गरेको हो। निर्वाचनको मुखमा भारतबाट नेपाल प्रवेश गरेको सूचना पाएपछि जिल्ला प्रहरी कार्यालय सप्तरीबाट प्रहरी नायब उपरीक्षक माधवप्रसाद काफ्लेको नेतृत्वमा पुगेको टोलीले उनलाई बोदे बर्साइनबाट पक्राउ गरेको हो।



    मियाँले आफ्नै साथी सप्तरीको विष्णुपुर गाउँपालिका–५ कट्टी टोल बस्ने ५० वर्षीय रामसुन्दर महतोको गत असोज ८ गते हत्या गरेको उजुरी जिल्ला प्रहरी कार्यालय सप्तरीमा दर्ता गरिएको थियो।



    महतोको शव सप्तरीको शम्भुनाथ नगरपालिका–१ स्थित खाँडोखोला नजिक रहेको सार्वजनिक पोखरीमा हत्याको भोलिपल्ट फेला परेको थियो।

    शव फेला परेपछि घटनाको अनुसन्धान गरिरहेको प्रहरीलाई उनले फोनमा हत्या स्वीकार गरी आफूलाई पक्राउ गर्न चुनौति दिएका थिए। भारतको विहारमा लुकेर बस्दै आएका आरोपित मियाँ यसअघि २०७४ जेठ १३ गते विष्णुपुर गाउँपालिका–७ बाट एक थान पेस्तोल र गोइत समूहको जनतान्त्रिक तराई मुक्ति मोर्चाको पर्चा पम्प्लेटसहित पक्राउ परेका थिए।

    मियाँ अवैध लागूऔषध व्यापार गर्ने, लुकाइछिपाइ हतियार बोकी हिँड्ने र जनमानसमा डर, त्रासको वातावरण सिर्जना गर्ने आपराधिक समूहका व्यक्ति भएको खुलेको पनि प्रहरीले जनाएको छ ।

    तत्काल पुर्पक्षका लागि कारागार चलान भएका उनी जरिवाना पश्चात नौ महिनापछि रिहा भएका थिए। मियाँ जनतान्त्रिक तराई मुक्ति मोर्चा गोइत समूहमा आबद्ध रही विभिन्न निर्माण कम्पनीका ठेकेदार तथा धनाढ्य व्यक्तिलाई फोन गरी धम्क्याइ चन्दा असुली गर्ने कार्यमा संलग्न रहेको प्रहरी अनुसन्धानमा खुलेको छ ।

    सम्बन्धित विषय
    प्रतिक्रिया

    Leave a Reply

    Your email address will not be published. Required fields are marked *

    नयाँ अपडेट
    अन्य समाचार