काठमाडौं । केन्द्रीय कारागारमा रहेका गुण्डा नाइके समीरमानसिंह बस्नेतलाई जेलभित्रै पुगेर भेट्ने डीएसपी मिलन केसीमाथि छानबिन सुरु भएको छ ।
गत आइतबार बिना जानकारी स्वयम्भूका डीएसपी मिलन केसीले गुण्डा नाइकेलाई भेटेको जानकारी पाएपछि जिल्ला प्रहरी परिसर काठमाडौंले छानबिन प्रक्रिया अघि बढाएको हो । काठमाडौं प्रहरी प्रमुख एसएसपी सुदीप गिरीले सो विषयमा छानबिन सुरु भएको जानकारी दिए ।
छानबिनका लागि एसपी दिनेशराज मैनालीको संयोजकत्वमा तीन सदस्यीय समिति गठन भएको उनले बताए । समितिले छानबिन गरेर प्रतिवेदन पेस गरेपछि दोषी देखिए कारबाही प्रक्रिया अघि बढाइने एसएसपी गिरीको भनाई छ । निर्माण व्यवसायी महासंघका अध्यक्ष शरदकुमार गौचनको २०७४ असोज १३ गते गोली हानी हत्यामा संलग्न भएको आरोपमा पक्राउ परेका बस्नेत भने अहिले केन्द्रीय कारागारमा जेल जीवन बिताइरहेका छन् ।
समीरमानलाई भेट्न डीएसपी केसी अर्का गुण्डा नाइके अमृत केसीलाई लिएर कारागार पुगेको खुलेको छ । केही समयअघि तत्कालीन गृहमन्त्री रामबहादुर थापाका सहोदर भाइलाईसमेत प्रयोग गरेर बस्नेतले जेलभित्रबाटै आपराधिक धन्दा सञ्चालन गरेको आरोप लागेको थियो । डिल्लीबजार कारागारमा डेढ वर्षको सजाय काटेर नरेश थापाको रिहाइ भइसकेका छन् ।
Leave a Reply