काठमाडौं । नेपाली कांग्रेसका महामन्त्री गगन थापाले काठमाडौं महानगरपालिकाको फोहोरको समस्या नबल्झिने गरी हल खोज्नुपर्ने बताएका छन् ।

काठमाडौंको फोहोर पुनः उठ्न थालेकोमा खुसी व्यक्त गर्दै उनले फेरि अवरोध हुन सक्ने संशयसमेत रहेको बताएका हुन् ।

उनले फोहोरको समस्या सधैँका लागि अन्त्य गर्ने विषयमा बिहीबार काठमाडौंका केही सांसद, काठमाडौं महानगरपालिका, जिल्ला प्रशासन, अन्य निकाय, शहरी विकास मन्त्रीसँगै बैठक बसेर छलफल गरेको जानकारी दिए ।

उनले फोहोर व्यवस्थापनका लागि स्थानीय सरकारले गरिरहेको काममा सहयोग पुर्‍याउने, स्थानीय सरकार र संघीय सरकारले गर्ने भनेका काम सम्बन्धित निकायले समयमा सम्पन्न गर्नुपर्ने बताए ।

‘काठमाडौंको फोहोर पुनः उठ्न थाल्यो, यो खुसीको खबर हो । तर,फेरि अवरोध पो हुने हो कि भन्ने संशय भने मनमा छ । यस पटक समस्या नबल्झिने गरी हल खोजौँ भन्ने चाहना र प्रयत्न हो । यसैका लागि आज काठमाडौंका केही सांसद, काठमाडौं महानगरपालिका,जिल्ला प्रशासन, अन्य निकाय, शहरी विकास मन्त्रीसँगै बैठक बस्यौँ । मूलतः फोहोर व्यवस्थापनको सन्दर्भमा स्थानीय सरकारले गरिरहेको काममा सहयोग पुर्‍याउने, स्थानीय सरकार र संघीय सरकारले गर्ने भनेका काम तत्-तत् निकायले समयमा सम्पन्न गर्ने नै हो’ उनले सामाजिक सञ्जालमा लेखेका छन् ।

उनले भने ‘समस्या बल्झेपछि अप्ठ्यारो परेको बेलामा मात्र जुट्ने नभई नियमित रूपमा बसौँ । कम्तीमा हप्तामा एक पटक सबै निकाय/अड्डालाई बोलाएर बसौँ,समीक्षा गरौँ, जहाँ जसले जे गर्नुपर्ने हो गरौँ ।’