काठमाडौं । १५ वर्षमुनिको साफ महिला च्याम्पियनसिप फुटबलको उपाधिका नेपालले जितेको छ ।

ढाकामा भएको निर्णायक खेलमा नेपालले बंगलादेशलाई १–१ को बराबरीमा रोकेको हो । खेल सकिन एक मिनेट अगाडि नेपालले पेनाल्टीबाट गोल हुन नदिएपछि उपाधि नेपालको पक्षमा गएको हो ।

डबल राउन्ड रोबिनको आधारमा भएको प्रतियोगितामा नेपालको चार खेलबाट १० अंक भएको छ । नेपाल प्रतियोगितामा अपराजित एक्लो टिम रह्यो । बंगलादेश भने सात अंकमै सीमित रह्यो ।

तीन टिम सम्मिलित प्रतियोगितामा भुटान अंकविहीन स्थितिमा पुछारमा रह्यो । नेपालले यसअघि बंगलादेशविरुद्धको पहिलो खेलमा १–० को जित निकालेको थियो ।

नेपालले बंगलादेशविरुद्धको दोस्रो खेलमा सुशिला केसीको गोलले १४ औं मिनेटमा अग्रता लिएको थियो । दोस्रो हाफको ५४ औं मिनेटमा बंगलादेशका लागि रुमा अख्तरले बराबरी गोल फर्काइन । महिला फुटबल इतिहासमा नेपालले उपाधि जितेको यो दोस्रो पटक हो ।