काठमाडौं । अख्तियार दुरुपयोग अनुसन्धान आयोगले सर्लाहीको चक्रघट्टा गाउँपालिकाका अध्यक्षसहित ११ जना बिरुद्ध मुद्धा दायर गरेको छ ।

जिल्लाको चक्रघट्टा गाउँपालिका ४, सुन्दरपुरस्थित वहिदको जग्गादेखि ढङ्ग्रा खोलासम्म पक्की नाला निर्माण गर्ने कार्यमा गुणस्तरहीन कार्य गरी भ्रष्टाचार गरेको पाइएकाले विशेष अदालतमा मुद्दा दायर गरेको हो ।

अख्तियारले चक्रघट्टा गाउँपालिकाको आर्थिक वर्ष २०७५/०७६ मा वहिदको जग्गादेखि ढङ्ग्रा खोलासम्म पक्की नाला निर्माणस्थलमा भए गरेको कार्यभन्दा बढी तथा साइटमा नगरे नगराएको परिमाणको कार्य भएको भनी नापी किताबमा चढाई ३ लाख ४१ हजार पाँच सय ४४ रुपैयाँ भ्रष्टाचार गरेको

भन्दै गाउँपालिका अध्यक्ष बिक्रम यादव, निमित्त प्रमुख प्रशासकीय अधिकृत मुकेश कुमार पाठक, इन्जिनियर अजय यादव र लेखापाल शिव शंकर प्रसाद कुसवाहाबिरुद्ध १३ लाख ६६ हजार १ सय ७६ रुपैँया बराबरको बिगो दावी गर्दै मुद्दा दायर गरिएको हो ।

आयोगले उक्त कार्य गर्ने उपभोक्ता समितिका अध्यक्ष शेख मो इरफान अलि, कोषाध्यक्ष हजरा खातुन र सचिव मो.इरफान विरुद्ध ३ लाख ४१ हजार ५ सय ४४ रुपैँया बिगो दावी गर्दै मुद्दा दायर गरिएको छ ।

पक्की नाला निर्माणमा गाउँपालिकासँग भएको सम्झौताबमोजिमको शर्त पालना नगरी, लागत अनुमान बमोजिम गर्नुपर्ने सबै कामहरु नगरी कार्य सम्पन्न भएको भनी नेपाल सरकारलाई गैरकानूनी हानी र आफूहरुलाई लाभ पुर्‍याउने बदनियतले

निर्माणस्थलमा भए गरेको कार्यभन्दा बढी र साईटमा नगरे नगराएको परिमाणको झुट्टा बिल भरपाई बनाई भए गरेको भनी भए गरेको भन्दा बढी मूल्याङ्‍कन गराएको पाइएको अख्तियारले जनाएको छ।

यस्तै, आयोगले गाउँपालिका अध्यक्ष यादव, वडा नं ४ का वडा अध्यक्ष अब्दुल अहद कवारी, गाउँ कार्यपालिका सदस्यहरु विजय कुमार चौधरी र विनोद साह, निमित्त प्रमुख प्रशासकीय अधिकृत मुकेश कुमार पाठक,

इन्जिनियर अजय यादव र सव-इन्जिनियर जितेन्द्र यादवलाई भ्रष्टाचार निवारण ऐन, २०५९ को दफा १९ को उपदफा (२) वमोजिम सजाय हुन मागदाबी गरेको छ ।