Jun 08 2026 | २०८३, जेठ २५ गते
08 Jun 2026 | सोमवार, जेठ २५ गते २०८३
सोमवार, जेठ २५ गते २०८३
Jun 08 2026 | २०८३, जेठ २५ गते
08 Jun 2026 | सोमवार, जेठ २५ गते २०८३
विराटनगर । उच्च अदालत विराटनगरको गेटमै दिनदहाडै एक व्यापारीमाथि खुकुरी प्रहार भएको छ । आइतबार बिहान मात्रै विराटनगर आइपुगेका काभ्रेका युवा व्यापारी ३२ वर्षीय कलामसिंह लामामाथि अपरान्ह खुकुरी प्रहार भएको हो ।
आइतबर विराटनगरस्थित वरिष्ठ अधिवक्ता सुरेशलाल श्रेष्ठको ल-फर्मबाट निस्किएर उच्च अदालतको गेट अगाडि पुगेपछि लामामाथि खुकुरी प्रहार भएको जिल्ला प्रहरी कार्यालय मोरङले जनाएको छ ।
मोरङ प्रहरीका अनुसार खुकुरी प्रहारबाट लामाको हात, पेट लगायत शरीरका विभिन्न भागमा चोट लागेको छ । अवस्था खतरामुक्त रहेका उनको विराट नर्सिङ होम एवं विराटनगर अस्पतालमा उपचार भइरहेको प्रहरीको भनाइ छ।
लामाको मोरङको कटहरी गाउँपालिका-६ मा रहेको मोरङ राजधानी इँटा उद्योगमा लगानी छ। उनको काठमाडौंमा सहकारी पनि रहेको बताइएको छ ।
लामामाथि खुकुरी हान्ने विराटनगर महानगरपालिका-११ का २७ वर्षीय विमल कार्कीलाई प्रहरीले पक्राउ गरेको छ। प्रहरीका अनुसार घटनामा प्रयोग भएको खुकुरीसहित भाग्दै गर्दा कार्कीलाई विराटनगरको कोसी अस्पतालनजिकबाट पक्राउ गरिएको हो। घटनामा संलग्न अर्का एक युवा फरार छन् । पहिचान खुल्न बाँकी रहेका ती युवाको खोजी तीव्र पारिएको प्रहरीको भनाइ छ।
प्रहरीका अनुसार लामाका साझेदार महम्मद साजिद मियाँले उजुरी गरेपछि जिल्ला प्रशासन कार्यालय मोरङले उद्योगको कारोबार रोकिदिएको थियो । प्रशासनको निर्णयविरुद्ध लामा जिल्ला अदालत जाने तयारीमा थिए । लामाका व्यावसायिक साझेदार साजिदलाई प्रहरीले पक्राउ गरी अनुसन्धान थालेको छ।
साजिदले लगानी नगरेपनि लाइसेन्स प्रयोग गर्न दिएर लामासँग पाँच वर्ष वार्षिक ५० हजार इँटा दिने सहमति गरेका थिए । उद्योगमा साजिद र उनकी श्रीमतीको ५०/५० प्रतिशत शेयर थियो। साजिदले श्रीमतीको नाममा रहेको ५० प्रतिशत शेयर लामालाई बेचेको प्रहरी अनुसन्धानबाट खुलेको छ।
तर, पछिल्लो समय साजिदले हिसाबकिताब नदेखाएको भन्दै जिल्ला प्रशासन कार्यालय मोरङमा उजुरी दिएका थिए । त्यसपछि दुबै जनाबीच बिबाद उत्पन्न भएको थियो। कारोबार फुकुवाको मागसहित मुद्दा दर्ताको तयारी गरेर निस्कँदा लामामाथि खुकुरी प्रहार भएको जिल्ला प्रहरी कार्यालय मोरङले जनाएको छ।
© 2026 All right reserved to onlinenepal.com
Design & Developed By
