काठमाडौं । अमेरिकी सहयोग परियोजना कर्पोरेशन (एमसीसी) सम्झौता आजको प्रतिनिधिसभा बैठकमा पेश नहुने भएको छ ।

केही बेरअघि बालुवाटारमा सम्पन्न प्रधानमन्त्री शेरबहादुर देउवा र माओवादी केन्द्रका अध्यक्ष प्रचण्डबीचको छलफलमा एमसीसी आज पेश नगर्ने सहमति भएको हो ।

प्रधानमन्त्रीका प्रेस संयोजक गोविन्द परियारका अनुसार भोलि ३ बजे गठबन्धनका नेताहरुको बैठक बस्ने सहमति भएको छ । एमसीसीबारे सो बैठकले थप निर्णय गर्ने बताइएको छ ।

यसअघि माओवादी संसदीय दलको बैठकले एमसीसीको विपक्षमा उभिने निर्णय गरेलगत्तै प्रचण्ड प्रधानमन्त्री देउवालाई भेट्न बालुवाटार पुगेका थिए ।