काठमाडौं । तनहुँमा नेपाली कांग्रेस र नेकपा एमालेबीच स्थानीय चुनावमा तालमेल हुने भएको छ । कांग्रेसका नेता तथा पूर्वगृहमन्त्री गोविन्दराज जोशी समूहले एमालेसँग चुनावी तालमेल गर्ने निर्णय गरेको हो ।

शनिबार जोशी निवास दमौलीमा दुवै पक्षका नेताहरुबीच भएको छलफलमा चुनावी तालमेल गर्ने सहमति भएको बताइएको छ । गोविन्दराज जोशीका छोरा दीपकराज जोशीले तनहुँका पालिकाहरुमा एमालेसँग तालमेल गर्ने सहमति भएको जानकारी दिए ।

उनका अनुसार एमालेसँग प्रत्येक पालिकाका प्रमुख/उपप्रमुख, अध्यक्ष/उपाध्यक्ष, वडाध्यक्ष र सदस्यहरुको साझा उम्मेदवार बनाउने सहमति भएको हो । दीपकराज जोशीले तनहुँको व्यास नगरपालिकाको प्रमुखमा उम्मेदवारी दिने यसअघि नै घोषणा गरिसकेका छन् ।

यस्तै नेकपा एमाले तनहुँ र जोशी समूहका ४/४ जना गरी ८ सदस्यीय ‘चुनाव परिचालन समिति’ गठन गर्ने निर्णय समेत भएको छ । तनहुँमा कांग्रेस नेता रामचन्द्र पौडेल र गोविन्दराज जोशीबीच द्वन्द्व छ । केन्द्रमा सत्तारुढ दलबीच गठबन्धन गर्ने छलफल चलिरहेका बेला तनहुँमा भने प्रमुख प्रतिपक्ष दलसँग कांग्रेस चुनावी तालमेल गर्न लागेको हो ।