काठमाडौं । बंगलादेश ‘ए’ लाई ३१ रनले हराउँदै भारत ‘ए’ ले एसीसी वुमन्स इमर्जिङ टिम्स कप क्रिकेटको उपाधि जितेको छ ।
हङकङमा बुधबार भएको फाइनल खेलमा भारत ‘ए’ ले १ सय २८ रनको लक्ष्य दिएको थियो । तर बंगलादेशले १९ ओभर २ बलमा सबै विकेट गुमाएर ९६ रनमात्र बनाउन सक्यो ।
बंगलादेशका लागि नहिदा अक्तरले १७ रन तथा सोभाना मोस्तारीले १६ रन जोडे । भारतका लागि श्रेयांका पाटिलले सर्वाधिक ४ तथा मन्नत कश्यपले ३ विकेट लिए ।
यसअघि टस जितेर पहिले ब्याटिङ गरेको भारतले निर्धारित २० ओभरमा ७ विकेट गुमाएर १ सय २७ रन बनायो । भारतका लागि दिनेश भृन्दाले सर्वाधिक ३६ तथा कनिका अहुजाले ३० रन बनाए ।
बंगलादेशका लागि नहिदा अक्तर र सुल्ताना खातुनले समान २-२ विकेट हात पारे ।
Leave a Reply