काठमाडौं । पछिल्लो सयम काठमाडौं उपत्यकालगायत देशभर नै हनी ट्रयापका गिरोह सक्रिय भएका छन् । प्रहरी कार्यालयहरुमा हनी ट्रयापका उजुरीहरु दैनिक रुपमा आउन थालेका छन् ।

सामान्यतः हनी ट्रयापबाट पीडित बनेको भन्दै धेरै पुरुषहरु प्रहरी कार्यालयमा पुग्ने गरेको तथ्यांक छ ।

हनी ट्रयापमा संलग्न कतिपयलाई प्रहरीले पक्राउ गरेपनि केही युवतीहरुले भने समूह नै बनाए हनी ट्रयाप जस्तो जघन्य अपराध गर्दै आएको खुलेको छ ।

हनी ट्रयापमा केही पेसेवर गिरोह नै संलग्न रहेकाले पनि हनी ट्रयापिङ गरेर पैसा कमाउने गिरोहकै कारण यस्ता घटना अचेल बढिरहेका छन् ।

गत बुधबार काठमाडौं उपत्यका अपराध अनुसन्धान कार्यालयले हनी ट्रयापमा पारेर काठमाडौंमा घडेरी मागेको तथा पाँच लाख रकम असुलेको आरोपमा दुई जना युवतीलाई पक्राउ गर्यो ।

पक्राउ पर्नेहरूमा कैलालीको गोदावरी नगरपालिका–१० कि ३४ वर्षीया ममता तामाङ र भक्तपुर नगरपालिका–१७ की ३४ वर्षीया आँचल चौगुठी छन् ।

उनीहरूमाथि सामाजिक सञ्जालमा चिनजान भएका एक युवकलाई ठमेलमा बोलाएर हनी ट्रयापमा पारेको आरोप छ ।

उनीहरुले ठमेलमा मदिरा सेवन गरेपछि युवकको नग्न फोटो, भिडिओ समेत लिएर ब्ल्याक मेलिङ गरेको र बलात्कार कसुरमा फसाउनेसम्म धम्की दिएका थिए ।

प्रहरीका अनुसार उनीहरुले सुरुमा काठमाडौंमा ४ आना जग्गा दिएमात्रै केस मिल्ने नत्र बलात्कारमा फसाउन धम्की दिएका थिए ।

यसैगरी हनी ट्रयापमा पारेर एक युवतीले नगद, जग्गा, सुन र आइफोन गरेर झण्डै डेढ करोड रकम झ्वाम पारेको अर्को घटना सार्वजनिक भएको छ ।

दाङमा घरजग्गाको कारोबार गर्दै आएका एक व्यक्तिले गत चैत २७ गते जिल्ला प्रहरी परिसर ललितपुर पुगेर आफू हनी ट्रयापमा परेको भन्दै उजुरी दिए ।

सोही उजुरीमाथि छानविन गर्दै ललितपुर प्रहरीले बैशाख २० गते शनिबार गोरखा जिल्ला शहिद लखन गाउँपालिका–९ नाम्जुङ घर भई काठमाडौं तथा ललितपुरमा बस्दै आएकी तारा गुरुङलाई पक्राउ गरेको छ ।

२०७८ सालमा बालाजुको एक दोहोरी साँझमा भेटिएकी तारासँग सम्बन्ध विस्तार गरेको एक हप्तामै उनले विभिन्न बहानामा दाङका ती व्यवसायीबाट रकम असुल्न थालिसकेकी थिइन् ।

ताराले पटक–पटक गरेर आफ्नो खातामा ४९ लाख ६२ हजार ३९० रुपैयाँ जम्मा गर्न लगाइन भने कहिले बहिनी, कहिले एक नाबालक बच्चा त कहिले सुन पसलेको खातामा गरेर झण्डै अर्को ५० लाख रुपैयाँ उछिट्याइन् । पीडित व्यवायीले ताराको खातामा ६० पटक रकम जम्मा गरेका छन् ।

पीडित भन्छन्–‘पटक–पटक सपिङ गराइदिदएको र नगद नै दिएको हिसाब गर्ने हो भने १ करोड ३० लाख भन्दा बढी रकम लगिसकी । र, पनि सधै टर्चर दिइरहेकाले बाध्य भएर प्रहरीकहाँ पुगेको हुँ ।’

बलात्कार मुद्दाको धम्कीपछि डराएर ती व्यवसायीले दुई वर्ष अघि ताराको मागअनुरूप उनैको परिवारका सदस्यसहित बसेर २० लाख दिने र सम्पर्कमा नरहने सहमति गरे । तर, ताराको धम्कीको क्रम रोकिएन । ताराले पटक–पटक बलात्कारको उजुरी दिने भन्दै धम्की दिएर रकम मागिरहिन् ।

यसरी मागेजति रकम दिंदा पनि घरमै आएर बेइज्जत गर्छु भनेर धम्क्याउने मात्रै नभई सामाजिक सञ्जालहरुमा फोटो नै शेयर गरेर बेइज्जत गर्न थालिन् ।

त्यतिमात्रै होइन रकम असुलीमा मास्टर माइण्ड भएकी ताराले कहिले प्रहरी कार्यालयको गेटमा त कहिले मिडियाका कार्यालयको अगाडि गएर फोटो खिचेर पीडितलाई पठाउने र रकम नपठाए बेइज्जत गरिदिने भन्दै धम्क्याउने गरिरहिन् ।

ताराको धम्कीका कारण कयौं पटक आफूले आत्महत्याको प्रयास गरेको पीडितले बताए । तराले दाङका ती व्यवसायीलाई मात्र नभई नुवाकोट घर भई हाल नयाँबजार बस्ने एक व्यक्तिको पनि घरबार विगारेर लाखौ असुलेकी छन् ।

ललितपुर प्रहरीले गोरखाकी ३३ वर्षीया तारा गुरुङलाई पक्राउ गरी अनुसन्धान सकेर शुक्रबार नै तीन वर्ष कैद सजायको माग गरी सरकारी वकिललाई फाइल पेश गरिसकेको छ । उनीमाथि प्रहरीले आपराधिक विश्वासघात तथा आपराधिक लाभ कसुरमा मुद्दा चल्ने भएको छ ।

अपराध संहिता, २०७४ अनुसार, आपराधिक विश्वासघात तथा आपराधिक लाभ लिएको पुष्टि भए एक वर्षदेखि १० वर्षसम्म कैद र ५० हजारदेखि एक लाख रुपैयाँसम्म जरिवाना हुने व्यवस्था छ ।