काठमाडौं । भिजिट भिसामा अरब मुलुक र यूरोपमा दैनिक २ सयसम्म नेपालीलाई पठाउने क्रममा दैनिक ५० लाख रुपैयाँ संकलन हुने गरेको सूचना पाएपछि अख्तियार दुरुपयोग अनुसन्धान आयोगले २ महिनादेखि सुक्ष्म निगरानी बढाएको थियो ।

निगरानीका क्रममा भिजिट भिसामा त्रिभुवन अन्तर्राष्ट्रिय विमानस्थल अध्यागमन कार्यालयका प्रमुख तीर्थराज भट्टराईसहितका कर्मचारीलाई स्टीङ अप्रेसन गर्ने तयारी अख्तियारले गरेको थियो ।

स्टीङ अप्रेसनको तयारी गरेको सूचना अख्तियारको उच्चतहबाटै गृहमन्त्रालयका सचिव गोकर्णमणि दुवाडीले पाएपछि तीर्थराज भट्टराईलाई हतार हतार गृहमन्त्रालयमा तानियो । र, बिष्णु कोइरालालाई अध्यागमनको प्रमुखमा पठाए ।

गृहसचिव दुवाडीलाई विमानस्थल अध्यागमनमा स्टीङ अप्रेसन गर्न लागेको सूचना अख्तियारकै सचिव नारायण शर्मा दवाडीले दिएको स्रोत बताउँछ ।

गोकर्णमणि र नारायण शर्माबीच दाजुभाइको नाता लाउने हार्दिक सम्बन्ध छ । नारायण र गोकर्णबीचको मोवाइल अख्तियारले चेक गर्ने हो भने अध्यागमनमा अख्तियारले स्टीङ गर्न लागेको सूचना कहाँबाट लिक भयो । र, तीर्थराजलाई गृहले त्यही सूचनापछि हतार हतार गृहमा झिकायो खुलस्त हुने स्रोत बताउँछ ।

अख्तियार स्रोतका अनुसार भट्टराईले लेखकलाई होइन, भिजिट भिसाको सेटिङको ठूलो हिस्सा सचिव गृहसचिव दुवाडी र मन्त्री लेखकका निजी सचिव बद्री तिवारीलाई दिने गरेको देखिएको छ । भिजिट भिसामा मन्त्री भन्दा पनि सचिवसँग बढी कनेक्सन देखिएन्छ ।

दवाडीकै जोडमा भट्टराई अध्यागमनमा लगिएका थिए

भिजिट भिसाको सेटिङको जालो गृहमन्त्रालयका सचिवसम्मै रहेको थियो । अध्यागमन कार्यालयका प्रमुख तीर्थराज भट्टराई र गृहका सचिव दुवाडी कुनै बेला संस्कृति मन्त्रालयमा सँगै कार्यरत थिए ।

हाल सहरी विकास मन्त्रालय रहेको भवनमा त्यतिबेला संस्कृति मन्त्रालय रहेको थियो । दुवाडी र भट्टराईको सम्बन्ध त्यतिबेलादेखि नै घनिष्ट रहेको थियो ।

त्यो सम्बन्धका आधारमा मन्त्री रमेश लेखकले भन्दा पनि सचिव दुवाडीकै जोडबलमा सुरेश पन्थीलाई तानेर तीर्थराज भट्टराईलाई विमानस्थल अध्यागमनको प्रमुख बनाइएको थियो ।

यता ,काठमाडौंस्थित अमेरिकी दूतावासले सहसचिव भट्टराईको अमेरिकाको भिसा रद्द गरेको छ । भिजिट भिसाको मानवतस्करीमा मुछिएपछि भट्टराई र उनको श्रीमतीको भिसा रद्द गरेको हो ।

अख्तियारले सहसचिव भट्टराईको बैंक खाता रोक्का गरी उनको सम्पत्ति समेत छानविन गरेको छ ।