बारा । अरुलाई कानुन सिकाउने जिल्ला प्रशासन कार्यालयका प्रमुखले भने आँफै मास्कको बारेमा मजाक गरेको तस्बिर सार्वजनिक भएको छ।

कोरोना महामारी फैलन थालेपछि मास्क नलगाई हिँडेका व्यक्तिलाई प्रहरी/ प्रशासनले पक्राउ सम्म गरेर चर्चा कमाउने गरेको छ। तर, अरुलाई नियम सिकाउने व्यक्ति भने मास्क समेत लगाउन जान्दैनन् ।

आफूलाई शासक र प्रशासक ठान्ने घटना नौलो होइन । कोरोना महामारीको बेला उनीहरुले दादागिरी देखाएका छन् ।आइतबार बाराका प्रमुख जिल्ला अधिकारी रुद्रप्रसाद पण्डित सुरक्षाकर्मीको दलबलसहित सीमानाकाको अनुगमनमा निस्किका थिए ।

अनुगमनका क्रममा नौ वटा मोटरसाइकलमा भारतबाट तस्करी गरी ल्याउन लागेको ४० बोरा रासायनिक मल जफत गरेर वीरगन्ज भन्सारमा बुझाएका प्रजिअ पण्डितले फेसबुकमार्फत जानकारी दिएका छन् ।

उनले उक्त पोस्टमा आफ्नो तस्विर समेत राखेका छन् । अनुगमनका क्रममा खिचिएको उक्त फोटो भने हास्यास्पद देखिन्छ । उनले लगाएको मास्कले मुख र नाक होइन निधार छोपेको थियो ।

निधारमा रहेको टोपी मुनि उनले मास्क लगाएका थिए । तस्विरमा उनले मास्क कतै निधारमा लगाएका छन् भने कतै चिउँडोमा लगाएका छन्। उनीसँगै रहेका केही सुरक्षाकर्मीले समेत मास्कको सही प्रयोग गरेका छैनन्।

प्रजिअ पण्डितसहित सुरक्षाकर्मीहरुबीच पर्याप्त दूरीसमेत कामय गरेको देखिँदैन।