एजेन्सी । अमेरिकाकी पहिलो महिला समाचार प्रस्तोता बारबरा वाल्टर्सको ९३ वर्षको उमेरमा निधन भएको छ । आधा दशक टेलिभिजनमा बिताएकी बारबरा सन् १९७६ मा एबीसी न्यूजमा आबद्ध भएसँगै अमेरिकाको पहिलो महिला समाचार प्रस्तोता बनेकी थिइन् ।

सन् १९२९ मा बोस्टनमा जन्मिएकी बारबराले १२ वटा एमी अवार्डसमेत जितेकी थिइन् । उनले रिचार्ड निक्सनदेखि डोनाल्ड ट्रम्पसम्म सबै अमेरिकी राष्ट्रपतिको अन्तरवार्ता लिएकी थिइन् ।

उनले सन् १९६१ मा पत्रकारिताको करियर सुरुवात गरेकी थिइन् । एनबीसीमा उनले महिला सम्बन्धी कार्यक्रम चलाउँथिन् । पुरुषहरूको वर्चश्व रहेको उद्योगमा उनले प्रगति गर्दै सन् १९७४ मा अमेरिकी समाचार कार्यक्रम एनबीसीको ‘टुडे शो’ मा अमेरिकाकी पहिलो महिला सह–प्रस्तोता बनिन् ।

एबीसीमा पहिलो महिला समाचार प्रस्तोता बनेसँगै उनको १० लाख डलरको तलबले उनलाई मिडियाको सुपरस्टार बनाएको थियो । ५२ वर्ष मिडियामा बिताएपछि उनले सन् २०१४ मा सन्यास लिएकी थिइन् । उनको अन्तिम कार्यक्रममा हिलारी क्लिन्टन र ओपरा विन्फ्री सहभागी भएका थिए ।