काठमाडौं । प्रधानमन्त्री पुष्पकमल दाहाल ‘प्रचण्ड’ले गौरा पर्वलाई आगामी वर्षदेखि राष्ट्रिय पर्वको रूपमा मनाउने घोषणा गरेका छन् ।

टुँडिखेलमा गौरा पर्वको अवसरमा आयोजित कार्यक्रमलाई सम्बोधन गर्दै प्रधानमन्त्री प्रचण्डले यस्तो बताएका हुन् ।

प्रधानमन्त्री प्रचण्डले आफू सुदूरपश्चिमका जनताको विकास नभई मुलुकको समृद्धि सम्भव छैन भन्ने विषयमा प्रस्ट रहेको बताए ।

प्रधानमन्त्री प्रचण्डले भने,‘सुदूरपश्चिमका जनताको भावनालाई कदर गरेर जानुपर्छ भन्नेमा हामी प्रस्ट छौं । म गौरा पर्वलाई राष्ट्रिय पर्व घोषणा गर्छु । बिदा दिने पनि घोषणा गर्छु ।’

प्रधानमन्त्री प्रचण्डले सुदूरपश्चिमको पहिचान, अधिकार र समृद्धिको लागि आफूले प्राथमिकता दिएको बताए ।उनले सुदूरपश्चिमको शिक्षा क्षेत्रलाई अघि बढाउने आफूले विगतदेखि नै पहल गर्दै आएको बताए ।