अनलाइन नेपाल
काठमाडौं । नेपाली कांग्रेसका जिल्ला नेता र प्रदेश मन्त्री करीब १ किलो सुन तस्करी प्रकरणमा मुछिएका छन् । जिल्ला प्रहरी परिसर, काठमाडौंले त्रिभुवन विमानस्थलबाट सोमवार ९६० ग्राम सुन बरामद गरेको थियो । सो सुनको व्यवस्थापक काभ्रे प्रतिनिधिसभा– १ प्रदेश सभा (क) बाट समानुपातिक सांसदका लागि सिफारिश समेत भएका कांग्रेस जिल्ला नेता विकास लामा भन्ने विकास योञ्जन रहेको खुलेको हो ।
उनी कांग्रेसको युवा संगठन तरुण दलका नेतासमेत हुन् । विशेष सूचनाका आधारमा मलद्वारमा लुकाएर दुबईबाट हिमालयन एयरलाइन्समार्फत मंगलबार बिहान साढे ९ बजे ल्याएको सुनसहित प्रहरीले काभ्रेको खानीखोला गाउँपालिका–३ का बाबुलाल दोङलाई पक्राउ गरेको थियो ।
सुनका भरिया दोङलाई पच्छ्याउँदै जाँदा सुन लिन आउने काभ्रेको रोशी गाउँपालिका–३, घट्टेखोलाका जगत लामा र महाभारत गाउँपालिका–३, सानोपोखरा घर भई बनेपा बस्दै आएका दोर्जे स्याङ्तान पक्राउ परेका थिए ।
उनीहरुको बयानबाट यसमा काभ्रेका नेता लामाको संलग्नता खुलेको प्रहरीले जनाएको छ । जिल्ला प्रहरी परिसर, काठमाडौंका अनुसार सुन प्रकरणमा मुछिएका लामाको खोजी भइरहेको छ । यस्तै लामाकै नामको सवारी साधन प्रयोग भएर सुन तस्करी गरिएको पाइएको छ ।
विकासले छाडेर भागेको बागमती प्रदेश ००१ २७ च ९९६० नम्बरको क्रेटा गाडी समेत प्रहरीले बरामद गरेको थियो । प्रहरीका अनुसार उक्त गाडीबाट कांग्रेस सांसद एवं बागमती प्रदेशका खानेपानी, ऊर्जा तथा सिञ्चाइ मन्त्री तीर्थ लामाले विकास योञ्जनका नाममा काटेको ६ लाखको चेक समेत फेला परेको थियो ।
दुबईबाट सुन ल्याउने कामको व्यवस्थापन विकास र लगानी मन्त्री तीर्थबहादुरले गर्ने गरेको प्रारम्भिक अनुसन्धानमा देखिएको प्रहरी स्रोतको भनाइ छ ।
सुन तस्करीमा नेपाली कांग्रेसका जिल्ला नेताको सवारी साधन प्रयोग भएपछि राजनीतिक पहुँचका आधारमा सुन तस्करी गरिएको दाबी गरिएको छ । यसबारे प्रहरीले थप अनुसन्धान गरिरहेको छ ।
हिमचुली मिडिया प्रा. लि.
इमेल: mail.onlinenepal@gmail.com
फोन नम्बर: +977- 01-4526373 (9851137729, 9851148387)
ठेगाना: न्यू प्लाजा, पुतलीसडक, काठमाडौं
दर्ता नम्बर: 1695/076/077
