कैलाली कारागार झडपपछि जेलर फेरिए

अनलाइन नेपाल

शनिवार , श्रावण २४, २०८२

धनगढी । कैलाली जिल्ला कारागारमा शुक्रबार राति भएको भीषण झडपमा एक कैदीको मृत्यु र ४७ जना घाइते भएपछि जेल प्रशासन नेतृत्व परिवर्तन गरिएको छ ।

जिल्ला प्रशासन कार्यालयका सूचना अधिकारी शिवराज जोशीका अनुसार जेलर बसन्त खत्रीलाई हटाई जालन्धर भुसाललाई नयाँ जेलरका रूपमा खटाइएको हो ।

भुसाल आइतबार दिउँसो ३ बजे कैलाली पुगेर कार्यभार सम्हालेका छन् । शुक्रबार राति भएको झडपमा धनगढी–४ का कैदी ३२ वर्षीय भरत चौधरीको मृत्यु भएको थियो ।

४७ जना घाइतेमध्ये एक गम्भीर अवस्थाका कैदीलाई उपचारका लागि काठमाडौं पठाइएको छ भने बाँकीको स्थानीय अस्पतालमा उपचार भइरहेको छ ।

केही समयका लागि कैदीहरूले कारागारको नियन्त्रण लिएका कारण अवस्था सामान्य बनाउन सुरक्षाकर्मीलाई हम्मे परेको थियो ।

घटनाबारे छानबिन गर्न सहायक प्रमुख जिल्ला अधिकारी किरण जोशीको संयोजकत्वमा पाँच सदस्यीय समिति गठन गरिएको छ। समितिलाई १० दिनभित्र प्रतिवेदन बुझाउने कार्यादेश दिइएको छ ।

तर कारागारको सुरक्षा र व्यवस्थापनमा चुकेका सिडियो गोगन बहादुर हमाल र प्रहरी प्रमुख बालनरसिंह राणाबारे निर्णय भएको छैन । उनीहरुको जिम्मेवारी खोस्न जनस्तरबाट चर्को दबाब बढेको छ ।

प्रतिक्रिया दिनुहोस्

नयाँ अपडेट

थप नयाँ अपडेट

कैलाली कारागार झडपपछि जेलर फेरिए