काठमाडौं । नेपालमा आइतबार(आज) मात्रै १६ जना नोवेल कोरोना भाइरस (कोभिड–१९) संक्रमित थपिएका छन् । यो सँगै नेपालमा कोरोना संक्रमितको संख्या ७५ पुगेको छ ।
स्वास्थ्य तथा जनसंख्या मन्त्रालयको केहि बेर अघिको नियमित पत्रकार सम्मेलनमा १० जना कोरोना संक्रमित थपिएको र जम्मा संक्रमितको संख्या ६९ पुगेको जनाएको थियो । जसमा नेपालगञ्जमा ९ जना र वीरगञ्जमा १ जनामा देखिएको बताइएको थियो ।
तर, त्यसको केही बेर पछि नै नेपागञ्जकै ६ जनामा कोरोना पुष्टि भएको हो । आज कारोना पुष्टि भएका मध्ये १ जना भने ७ वर्षिया बालक हुन् ।
यद्यपी मन्त्रालयले भने ती ७ वर्षीय बालक वा बालिका को हुन् भन्ने बारेमा खुलाएको छैन । यसअघि सबैभन्दा कम उमेरकोमा कोरोना संक्रमण देखिएको भनेको जनकपुरका १४ वर्षीय बालक हुन् ।
नेपालमा हालसम्मको तथ्यांक हेर्दा सबैभन्दा कम उमेर नेपालगञ्जका ७ वर्षका विरामी र सबैभन्दा बढी उमेर पेप्सीकोलाकी ८१ वर्षीया वृद्धामा कोरोना संक्रमण देखिएको छ । तर, ति बृद्धा भने ११ दिनमै निको भएर घर फर्किसकेकी छिन् ।
विश्व स्वास्थ्य संगठन (डब्लूएचओ) को तथ्याङ्कअनुसार अहिलेसम्म कोभिड–१९ बाट ९ वर्षसम्मका बालबालिकाको मृत्यु भएको छैन । कोभिड–१९ को संक्रमणको जोखिम ८० वर्षभन्दा माथिका व्यक्तिमा देखिएको छ ।
अहिलसम्म नेपालमा कोरोना संक्रमित निको हुनेको संख्या १६ रहेको छ । तर, यसअघि निको भएर घर फर्किएका रौतहटका १९ वर्षीय युवकलाई भने रिपोर्ट शंकास्पद देखिएपछि पुनः नारायणी अस्पताल वीरगन्जको आइसोलेसनमा ल्याइएको छ ।
Leave a Reply