काठमाडौं । नेपाल कम्युनिस्ट पार्टी (नेकपा) प्रचण्ड-नेपाल समूहले मंगलबार राजधानी काठमाडाैं र विभिन्न शहरहरुमा अन्तर्किया गर्दैछ।

नेकपा प्रवक्ता नारायणकाजी श्रेष्ठका अनुसार प्रधानमन्त्री केपी शर्मा ओलीको संसद विघटनको असंवैधानिक, अलोकतान्त्रिक, निरंकुश र प्रतिगामी कदमविरुद्ध खबरदारी गर्न र यो कदम उल्ट्याउन देशव्यापीरुपमा अन्तर्क्रिया गर्न लागिएकाे हाे । अन्तर्क्रियाको नेतृत्व अध्यक्ष माधवकुमार नेपाल र स्थायी कमिटीका अन्य सदस्यहरुले गर्दै छन्।

प्रचण्ड-नेपाल समूहले सोमबारको स्थायी कमिटी बैठकले ओलीकाे कदमविरुद्ध आन्दोलनलाई अझ सशक्त बनाउनका लागि विपक्षी दल र नागरिकसमाजसँग सहकार्य गर्न पहल तीव्र बनाउने निर्णय गरेको थियो।

यस्तै सोमबारको बैठकले केन्द्र, प्रदेश र जिल्लास्तरीय पदाधिकारी छनौटलगायत पार्टी एकताका बाँकी काम सम्पन्न गर्नका लागि अध्यक्ष नेपालको नेतृत्वमा गृहकार्य कार्यदल गठनसमेत गरेको थियो।