काठमाडौं । प्रधानमन्त्री समेत रहेका वर्तमान सभापति शेरबहादुर देउवा र शेखर कोइराला दुवैमा प्यानलमा नपरेका विश्वप्रकाश शर्माले प्रकाशमान सिंहको प्यानलबाट महामन्त्रीमा उम्मेदवारी दर्ता गरेका छन् ।

उम्मेदवारी दर्ताका लागि राष्ट्रियसभा गृह प्रवेश गर्नुअघि सञ्चारकर्मीहरुसँग कुरा गर्दै शर्माले उम्मेदवारी दर्तापछि मात्रै प्यानलको बारेमा बताउने जानकारी दिएका छन् ।

आज दिउसोसम्म पनि शर्मा दुवै समूहबाट महामन्त्रीको उम्मेदवार बन्ने चर्चा रहेको थियो । कृष्णप्रसाद सिटौलासँग देउवाले गठबन्धन गरेपछि असन्तुष्ट रहेका शर्माको शेखर कोइरालाको प्यानलबाट महामन्त्री बन्ने चर्चा सुरु भएको थियो ।

तर, कोइराला प्यानलमा पनि नपरेपछि अन्ततः शर्माले प्रकाशमान सिंहको टिमबाट महामन्त्रीको उम्मेदवारी दर्ता गराएका हुन् । सिंहको प्यानलबाट महामन्त्रीको चर्चामा रहेका मिनेन्द्र रिजालले उपसभापति बन्न अस्वीकार गरेपछि शर्माको नाम काटिएको थियो ।