काठमाडौं । म्याद नाघेको जुस खाँदा जुम्लामा २५ जना विद्यार्थी बिरामी भएका छन् ।

जिल्लाको पूर्वी भेगमा पर्ने गुठीचौर गाउँपालिका ५ देपालगाउँको हिमाली बोर्डिङ स्कुलका विद्यार्थीले म्याद नाघेको जुस खाँदा उनीहरू बिरामी परेका हुन् ।

म्याद नाघेको जुस खाँदा दुई सय ६० मध्ये २५ जना विद्यार्थी विरामी परेका प्रधानाध्यापक मन्जील गिरीले जानकारी दिए । पानीमा पनि केही मिसिएको हो कि भन्ने आशङ्कामा पानी परीक्षण गर्न थालिएको उनको भनाई छ ।

विद्यार्थीमा पेट दुख्ने, टाउको दुख्ने समस्या देखिएपछि विद्यालय आज बुधवारदेखि आउँदो आइतवारसम्म बन्द गर्ने निर्णय गरेको प्रधानाध्यापक गिरीले बताए ।

औषधि खाएपछि अहिले विद्यार्थीहरूको अवस्था सामान्य भएको छ । यस विषयमा अभिभावकसँग पनि छलफल गर्ने तयारी गरेको उनले बताए ।