काठमाडौं । प्रहरीले अनलाइनमा लगानी गरेर दोब्बर नाफा हुन्छ भन्दै ठगेको आरोपमा एक जनालाई पक्राउ गरेको छ ।

जुम्लाको चन्दननाथ नगरपालिका-६ घर भइ हाल काठमाडौंको नरेफाँट बस्ने २४ वर्षका राज रोकाया पक्राउ परेका हुन् ।

प्रहरीका अनुसार उनले सामाजिक सञ्जाल इन्स्टाग्राममा साथी बनाइ कुराकानी गरी अनलाइनमा रकम लगानी गरे बापत दोब्बर हुन्छ भनी इसेवा, खल्ती जस्ता वालेटहरुमा रकम पठाउन लगाइ ठगेका थिए ।

उनले अहिलेसम्म विभिन्न व्यक्तिसँगबाट ७ लाख ७५ हजार २०० रुपैयाँ ठगेको प्रहरीले जनाएको छ ।

हाल काठमाडौं महानगरपालिका–३२ नरेफाँट बस्दै आएका उनलाई ठगीसम्बन्धी कसुरमा आवश्यक अनुसन्धान तथा कारबाहीका लागि जिल्ला प्रहरी परिसर टेकुमा बुझाइएको छ ।