काठमाडौं । जिल्ला अदालत काठमाडौंले सचिव टेकनारायण पाण्डेलाई तीन दिन थुनामा राख्न अदालतले अनुमति दिएको छ ।

नक्कली भुटानी शरणार्थी खडा गरी अमेरिका पठाउने धन्दामा संलग्न रहेको आरोपमा पक्राउ परेका उपराष्ट्रपति कार्यालयमा कार्यरत सचिव पाण्डेमाथि अनुसन्धान गर्न अदालतले तीन दिनको समय दिएको हो ।

पाण्डेमाथि शरणार्थी भनेर अमेरिका पठाएर ठगी गर्ने गिरोहलाई सघाएको आरोप छ । गृहसचिव रहेको समयमा आर्थिक लाभ लिएर नक्कली शरणार्थी बनाई अमेरिका पठाउने धन्दामा सघाएको आरोपमा उनी बुधवार पक्राउ परेका हुन् ।

बालकृष्ण खाण गृहमन्त्री रहेको समयमा पाण्डे सचिव थिए । अदालतले ठगी र संगठित अपराध सम्बन्धी कसूरमा अनुसन्धानका लागि ३ दिन हिरासतमा राख्न अनुमति दिएको जिल्ला प्रहरी परिसर काठमाडौंले जनाएको छ ।

प्रहरीको उपत्यका अपराध अनुसन्धान कार्यालयले १२ चैतमा भुटानी शरणार्थी बनाएर अमेरिका पठाइदिन्छु भन्दै असूली गरेको आरोपमा मोरङका केशव दुलाल, ललितपुरका सानु भण्डारी र पाँचथरका टेक गुरुङलाई पक्राउ गरेको थियो ।