काठमाडौं । नेकपा एमालेका अध्यक्ष केपी शर्मा ओलीले मेडिकल व्यवसायी दुर्गा प्रसाईंलाई गिरफ्तार गर्न भनेर प्रधानमन्त्रीसँग आग्रह नगरेको स्पष्ट पारेका छन् ।

गण्डकी प्रदेश अधिवेशनबाट निर्वाचित पदाधिकारीको शपथ समारोहलाई सोमवार पोखरामा सम्बोधन गर्दै ओलीले प्रसाईंलाई पक्राउ गर्न पुष्पकमल दाहाल ‘प्रचण्ड’सँग बिन्ती नबिसाएको स्पष्ट पारेका हुन् ।

प्रसाईँलाई पक्राउ गर्न ओलीले प्रधानमन्त्री ‘प्रचण्ड’लाई दबाब दिएको भन्ने समाचार सार्वजनिक भएको सन्दर्भमा उनले आफ्नो शिर काटिए पनि ‘प्रचण्ड’सँग नझुक्ने बताए।

‘अहिले दुर्गा प्रसाईंसँग ओली किन डराएको छ ? किन डरायो भनेर लेखेका छन् । प्रचण्डलाई भेटेर मैले उनलाई गिरफ्तार गर्दिन पर्‍यो भनेर बिन्ती बिसाए रे !’ ओलीले भने, ‘काटिएर जाओस् बरु यो शीर, त्यस्तासँग झुक्दैन । भोकै मर्छ होला घाँसका त्यान्द्रा टिप्न बाघ जाँदैन ।’