काठमाडौं । नेकपा एमालेको दुई हप्तादेखि जारी समृद्धि संकल्प यात्रा आजबाट कोशी प्रदेशमा प्रवेश गर्दैछ ।
पार्टीको प्रचार तथा प्रकाशन विभागका प्रमुख राजेन्द्र गौतमका अनुसार गएराति रामेछापको मन्थली पुगेको यात्रा टोलीले आज बागमती प्रदेशका रामेछाप र सिन्धुली जिल्ला पार गर्दै कोशी प्रदेशको उदयपुर स्थित घुर्मीमा आमसभा गर्नेछ ।
आज सिन्धुलीको खुर्कोट, ओखलढुंगाको हर्कपुर र खोटाङको हलेसीमा स्थानीय बासिन्दा, कार्यकर्ता र नेताहरुसँग अन्तरक्रिया गर्दैछ।
आजको बास खोटाङको दिक्तेलमा हुनेछ। १९ दिने यात्राको सबै भन्दा छोटो दुरी आजको यात्रामा पार गर्नुपर्ने छ । एमालेको कार्यक्रमस्थल र बसोबास स्थलमा कडाइ गरिनेछ ।
एमालेको कार्यक्रममा अवरोध गर्नेगरी पहिचान पक्षधरले कार्यक्रम घोषणा गरेपछि सुरक्षा निकायले एकीकृत सुरक्षा रणनीति अपनाएको छ । नेपाल प्रहरीका करिब तीन हजार सुरक्षाकर्मी एमाले यात्रामा परिचालन गरिने तयारी छ ।
उदयपुरको कार्यक्रममा करिब एक हजार पहिचान पक्षधर उपस्थित हुने सुरक्षा निकायको अनुमान छ । जाडो समय भएकाले बस्ने र खानेको टुंगो नहुने भएकोले पहिचान पक्षधरको ठूलो संख्या अवरोधमा नआउने अनुमान गरिएको छ । झडपको अवस्था आउने देखेमा पहिचान पक्षधरका नेतालाई बिहानैदेखि नियन्त्रणमा लिने सुरक्षा रणनीति छ ।
Leave a Reply