अछाम । ललितपुरको बालकुमारीमा प्रहरीको गोली लागरे मारिएका अछामको चौरपाटी गाउँपालिका-१ का बीरेन्द्र शाहको आज दाहसंस्कार गरिएको छ ।

गत शुक्रबार रोजगार अनुमति प्रणाली (इपिएस) परीक्षार्थीहरु र प्रहरीबीचको झडपका क्रममा मारिएका उनको आज बुढीगंगा नदी किनारमा अन्तिम संस्कार गरिएको हो ।

मंगलबार बिहान काठमाडौंबाट हेलिकोप्टरमार्फत ल्याइएको शव आज दिउँसो उनको घर चौरपाटी गाउँपालिका-१ सिउँडी पुगेको थियो ।

उनको शवयात्रामा गाउँपालिका जनप्रतिनिधिलगायत विभिन्न क्षेत्रका मानिसहरू सहभागी थिए । सरकार र बालकुमारी घटनामा मृत्यु भएका पीडितका परिवारकाबीच चार बुँदे सहमतिपछि शव बुझिएको थियो ।

शुक्रबार पानीजहाज बनाउने कामका लागि कोरिया भाषा परीक्षा दिएका, तर फेल भएका युवाहरुले पुनः भाषा परीक्षामा सहभागी हुन पाउनुपर्ने माग गर्दै ललितपुरको बालकुमारी क्षेत्रमा प्रदर्शन गरेका थिए । त्यस क्रममा प्रहरीसँगको धरपकडमा दुई युवकको मृत्यु भएको थियो ।