काठमाडौँ । काठमाडौँमा शृङ्खलाबद्ध चोरीमा संलग्न रहेको आरोपमा प्रहरीले दुई जनालाई पक्राउ गरेको छ ।
काठमाडौँ उपत्यका अपराध अनुसन्धान कार्यालयका अनुसार काठमाडौँ महानगरपालिका–२० बस्ने ३७ वर्षीय जोन खड्गी र काठमाडौँ महानगरपालिका–३० मैतीदेवी बस्ने ३४ वर्षीय सञ्जय खड्गी पक्राउ परेका हुन् ।
गत वैशाख १६ गते दिउँसो ताहाचलस्थित सविना खड्काको डेराबाट ल्याप्टप, मोबाइल फोन र २ तोला सुनसहित गरगहना चोरी भएको थियो ।
उक्त घटनाको अनुसन्धानको क्रममा जोन र सञ्जयले चोरी गरेको खुलेको थियो । उनीहरूलाई शनिबार साँझ धुम्बाराहीबाट पक्राउ गरिएको प्रहरीले जनाएको छ ।
उनीहरूमाथि थप अनुसन्धान र कारबाहीका लागि प्रहरी वृत्त कालीमाटी पठाइएको छ ।
Leave a Reply