सिन्धुली । नेपाली कांग्रेसका महामन्त्री गगन थापाले नेपाल विद्युत् प्राधिकरणका कार्यकारी निर्देशक कुलमान घिसिङप्रति सरकारको व्यवहार ठिक नभएको बताएका छन् ।
शनिबार सिन्धुलीमा आयोजित एक कार्यक्रममा उनले यस्तो बताएका हुन् । सरकारले कुलमानलाई किचकिच गरिरहेको जस्तो देखिएको उनले बताए ।
नेपाल विद्युत् प्राधिकरणका कार्यकारी निर्देशक कुलमान घिसिङलाई पदबाट हटाउनका लागि ऊर्जामन्त्री दीपक खड्काको पटकपटक प्रयासपछि मन्त्रिपरिषद् नै अगाडि बढेको छ ।
सरकारले घिसिङलाई पदबाट हटाउने अन्तिम कसरत गरिरहेका बेला सत्तारुढ कांग्रेसका महामन्त्री गगन थापाले सार्वजनिक मञ्चबाटै असन्तुष्टि जनाएका हुन् ।
मन्त्रिपरिषद्ले घिसिङलाई पदबाट हटाउन अन्तिम तयारी गरेपछि महामन्त्री थापाले असन्तुष्टि जनाउँदै यस्ता नचाहिने काममा नलाग्नु मन्त्रीलाई सुझाव दिएका छन् । मन्त्री खड्काले गरिरहेका नचाहिने काम रोक्न प्रधानमन्त्री केपी शर्मा ओलीलाई उनले आग्रह गरेका छन् ।