काठमाडौं । भारतको जम्मू कश्मीरको पहलगाममा आतंकवादी आक्रमणमा परी मृत्यु भएका नेपाली सुदीप न्यौपानेको शव आजै नेपाल पठाउने तयारी भएको छ ।
नयाँदिल्लीस्थित नेपाली दूतावासले सुदीपको शव नेपाल पठाउने प्रक्रिया सुरु गरेको हो । अहिले शवको पोष्टमार्टम कार्य भइरहेको बताइएको छ ।
सम्भव भएसम्म आज साँझ, नभ्याए भोलि नेपाल पठाइने नयाँ दिल्लीस्थित नेपाली दूतावास स्रोत बताउँछ । सुदीप गत शनिबार आमा र दुई नातेदारसँगै भारतको जम्मू कश्मीर घुम्न गएका थिए ।
आतंकवादीहरूले मंगलबार जम्मू कश्मिर घुम्न गएका पर्यटकमाथि आक्रमण गर्दा सुदीप पनि परेका थिए । घटनामा २६ जना पर्यटकको मृत्यु भएको दाबी गरिएको छ ।