दैलेख । दैलेख प्रहरीले प्रेम, पैसा र योजनाबद्ध षड्यन्त्रमा आधारित एउटा चर्चित हत्याकाण्डको सफल अनुसन्धान गरी तीन जना प्रतिवादीलाई अदालतमा पेश गरेको छ ।

साउन ११ गते बिहान करिब ६ बजे दुल्लु नगरपालिका–११, कयलकुनास्थित छामघाट खोलाको किनारमा एक युवक मृत भेटिएपछि सुरु भएको अनुसन्धानले ठूलो रहस्य खोलेको हो ।

तल्लो भाग नग्न र माथिल्लो भागमा “BE THE CHANGE MALAYASIA” लेखिएको टिसर्ट लगाएका अन्दाजी ३५–४० वर्षका देखिने शव चामुण्डाबिन्द्रासैनी–६ पिपलचौरका २७ वर्षीय सुरेन्द्र बहादुर शाहीको भएको सनाखत भएको थियो ।

घटना रहस्यमय भएपछि मृतकका बुबा झक्क बहादुर शाहीले अज्ञात प्रतिवादीविरुद्ध कर्तव्य ज्यानसम्बन्धी जाहेरी दिँदा प्रहरीले अनुसन्धान अघि बढाएको थियो ।

घटना शंकास्पद भएकाले प्रहरीले सुरेन्द्रको शव भेटिएको मितिदेखि विभिन्न कोणबाट सूक्ष्म अनुसन्धान थालेको थियो । अनुसन्धानबाट सर्वप्रथम महाबु गाउँपालिका–५ कासीकाधकी २७ वर्षीया गंगा वनको संलग्नता खुलेको जिल्ला प्रहरी कार्यालय दैलखका प्रमुख प्रहरी नायव उपरीक्षक (डीएसपी) गणेश बहादुर बरालले जानकारी दिए ।

डीएसपी बरालका अनुसार वैदेशिक रोजगारीका लागि सुरेन्द्र ३३ महिनाअघि मलेसिया गएका थिए । उनी विदेश गएको एक वर्षपछि श्रीमतीले घरमा दुई छोरी, एक छोरा अलपत्र पारेर गाउँकै अर्को पुरुषसँग विवाह गरिन् । पत्नी अर्कैसँग गएपछि तनावमा थिए । त्यसपछि उनको फेसबुकमार्फत गंगासँग प्रेम सम्बन्ध बस्यो ।

विवाह गर्ने प्रलोभन देखाउँदै गंगाले सुरेन्द्रलाई विभिन्न समयमा ४ लाख ४६ हजार ९२० रुपैयाँ पठाउन बाध्य बनाएकी थिइन् । तर पैसा लिएको केही समयपछि उनले मृतकलाई फेसबुकमा अनफ्रेण्ड गर्दै मोबाइलमा समेत ब्लक गरिन् । विदेश जान भिसा प्रक्रियाका लागि काठमाडौंसमेत पुगेकी थिइन् ।

मृतक नेपाल आएपछि गंगाका बुबा नैने वन र आमा भकु वनले समेत ‘छोरीसँग विवाह गरिदिन्छौं’ भन्दै नियमित सम्पर्क राखे । यही विश्वासमा मृतकलाई साउन १० गते राति महाबु गाउँपालिका–४ र ५ जोड्ने छामघाट खोलामाथिको झोलुङ्गे पुलमा बोलाइयो ।

त्यहीँ राति करिब ११ बजे गंगा र सुरेन्द्रबीच झगडा भयो र योजनाबद्ध रूपमा उनलाई पुलबाट खोलामा खसालेर हत्या गरिएको प्रहरी अनुसन्धानबाट पुष्टि भएको छ ।

अनुसन्धानपछि गंगा वनमाथि कर्तव्य ज्यान र आपराधिक लाभ सम्बन्धी मुद्दा दर्ता गरिएको छ भने उनका बुबा–आमामाथि आपराधिक षड्यन्त्र, उद्योग, दुरुत्साहन र मतियारको मुद्दा चलाइएको छ ।

घटना अत्यन्त जटिल र योजनाबद्ध देखिए पनि दैलेख प्रहरीले संयमित अनुसन्धान गरी घटनामा संलग्न तीनै जनालाई कानुनी दायरामा ल्याउन सफल भएको हो । घटनाका आरोपित तीनै जनालाई मंगलबार पुर्पक्षका लागि थुनामा पठाउन दैलेख जिल्ला अदालतले आदेश दिएको छ ।

जिल्ला प्रहरी कार्यालय दैलेखले सुरेन्द्रको हत्या भएको निष्कर्ष सहतिको प्रतिवेदन बुझाएपछि सरकारी वकिल कार्यालयले दैलेख जिल्ला अदालतमा आइतबार ‘कर्तव्य ज्यान’ सम्बन्धी मुद्दा दर्ता गरेको थियो ।