सामाजिक अभियान्ता आशिका तामाङको प्रधानमन्त्रीलाई खुला पत्र

अनलाइन नेपाल

बुधवार , आश्विन ८, २०८२

सामाजिक अभियान्ता आशिका तामाङको प्रधानमन्त्रीलाई खुला पत्र

काठमाडौं । सामाजिक अभियान्ता आशिका तामाङले प्रधानमन्त्री सुशीला कार्कीलाई खुला पत्र लेख्दै जेनजीआन्दोलन’मा घाइते भएका युवाहरूको बारेमा सरकारको बेवास्ता भएको भन्दै गुनासो व्यक्त गरेकी छन् ।

उनले बुधबार राति सामाजिक सञ्जालमार्फत सहिद परिवारलाई लक्षित गरी सरकारले केही निर्णय गरेको भए पनि घाइते युवाहरूको उपचार र जीवनयापनसम्बन्धी समस्यामा सरकार मौन रहेको आरोप लगाएकी हुन् ।

'तपाईंहरू सरकारमा गएपछि पहिलो निर्णय घाइतेहरूलाई निःशुल्क उपचारको भने गर्नुभयो। तर सबै उपचार निःशुल्क हुँदैन। औषधि किन्नुपर्छ, ड्रेसिङ गर्न पैसा लाग्छ, बिरामी कुरुवालाई त झन् समस्या छ—कहाँ बस्ने, कहाँ खाने ?' भन्दै तामाङले पत्रमा उल्लेख गरेकी छन् ।

उनका अनुसार अधिकांश घाइतेहरू काठमाडौंमा कोठा भाडामा बस्ने, दैनिक मजदुरी गरेर जीविका चलाउने युवा हुन् ।

चोटपटकका कारण उनीहरूले कम्तीमा तीन महिना काम गर्न नसक्ने अवस्था रहेको र यो परिस्थितिमा उनीहरू थप मानसिक, भौतिक र आर्थिक संकटमा परेको तामाङको भनाइ छ।

यस्ता छन् उनका मागहरू

१. तत्काल घाइते परिवारलाई १ लाख सम्म उपलब्ध गराइयोस् ।
२. घाइते र वीरगति प्राप्त भाइबहिनीहरूको सम्पूर्ण विवरण सार्वजनिक गरियोस् ।
३. ती निर्दोष भाइबहिनीहरूलाई गोली हान्न दिने हत्यारा अपराधीहरूलाई तुरुन्त कारबाही गरियोस् ।

'कति पीडा छ ती भाइबहिनीहरूलाई भोग्नेलाई मात्र थाहा हुन्छ,' तामाङले भनेकी छन् । उनले सरकारलाई घाइतेहरूको विषयमा यथाशीघ्र निर्णय लिन आग्रह गर्दै भगवान पशुपतिनाथले सबैको रक्षा गरून् भन्ने कामना गरेकी छन्।

प्रतिक्रिया दिनुहोस्

नयाँ अपडेट

थप नयाँ अपडेट

सामाजिक अभियान्ता आशिका तामाङको प्रधानमन्त्रीलाई खुला पत्र