काठमाडौं । नेपाली कांग्रेसका सहमहामन्त्री फर्मुल्लाह मन्सुरले नियमित महाधिवेशनको औचित्य समाप्त भइसकेको भन्दै विशेष महाधिवेशनमार्फत नयाँ नेतृत्व चयन गर्नुपर्ने धारणा राखेका छन् ।
शुक्रबार पार्टी केन्द्रीय कार्यालय सानेपामा सञ्चारकर्मीसँग कुरा गर्दै उनले यस्तो बताएका हुन् ।
कांग्रेसभित्रका परिवर्तनविरोधी शक्तिहरूको षड्यन्त्र चिर्न विशेष महाधिवेशन आवश्यक रहेको उनको भनाइ छ ।
उनले भने- 'नेपाली कांग्रेस नयाँ नेतृत्वको साथ आसन्न निर्वाचनमा जानुपर्छ । त्यसको लागि नियमित महाधिवेशन गरौँ । यदि नियमित महाधिवेशन सम्भव छैन भनेर विषेश महाधिवेशन गरौँ । सोहीअनुसार नयाँ नेतृत्व, नीति र कार्यदिशाका साथ अगाडि बढ्नुपर्छ । गगनलाई नै पार्टी सभापति र प्रधानमन्त्रीको लागि अघि सारेर कांग्रेस निर्वाचनमा जानुपर्छ ।'
उनले पार्टी महामन्त्री गगनकुमार थापालाई पार्टी सभापति तथा प्रधानमन्त्रीका लागि अघि सारेर कांग्रेस निर्वाचनमा जानुपर्ने प्रस्ताव पनि राखेका छन् ।