एजेन्सी। तालिबानको अन्तरिम सरकार गठन भएपछि रुसी राष्ट्रपति भ्लादिमिर पुटिनले अफगानिस्तानको अवस्थाका लागि अमेरिकालाई दोषी ठहराएका छन्।

भ्लादिमिर पुटिनले बिहीबार अनलाइन ब्रिक्स शिखर सम्मेलनको १३ औं सत्रलाई सम्बोधन गर्दै यस्तो बताएका हुन्।

उनले भने, ‘अमेरिका र उसका सहयोगीहरु अफगानिस्तानबाट पूर्ण रुपमा बाहिरिए पछि नयाँ संकट उत्पन्न भयो।  भर्खरै विश्वव्यापी सुरक्षाका लागि एक ठूलो चुनौती रहेको छ। ‘

‘हामी अफगानिस्तानबाट मानिसहरुको पलायन रोक्न चाहन्छौं। हामी चाहन्छौं कि त्यहाँ लोकतान्त्रिक संस्थाहरु बन्ने हो, तर बाह्य हस्तक्षेप यसको लागी उपयुक्त हुने छैन।’ पुटिनले थप भने।

उनले बाँकी विश्वलाई भने, “हामी सबै चाहन्छौं कि त्यहाँ शान्ति होस्। हामीले उनीहरुको आन्तरिक मामिलामा हस्तक्षेप नगर्ने र उनीहरुको सार्वभौमसत्ताको सम्मान गर्ने निर्णय गर्नु पर्छ। अफगान नागरिकहरु दशकौंदेखि लडिरहेका छन्। उनीहरुलाई आफ्नो निर्णय गर्ने अधिकार छ। ‘

कोरोना महामारीलाई ध्यानमा राख्दै, ब्रिक्स शिखर सम्मेलनको १३ औं सत्र भिडियो लिंकको माध्यमबाट आयोजना गरिएको थियो।

सम्मेलनमा चीनका राष्ट्रपति सी जिनपिङ , दक्षिण अफ्रिकाका राष्ट्रपति सिरिल रामाफोसा र ब्राजिलका राष्ट्रपति जैर बोल्सोनारो पनि सहभागी थिए। बैठकको अध्यक्षता भारतीय प्रधानमन्त्री नरेन्द्र मोदीले गरेका थिए।

यसअघि बुधबार रुसी सुरक्षा परिषदका महासचिव निकोलाई पत्रुशेवले नयाँ दिल्लीमा भारतका राष्ट्रिय सुरक्षा सल्लाहकार अजित डोभाललाई भेटेका थिए। बैठकमा भारत र रसियाले अफगानिस्तानको अवस्थाको विस्तृत समीक्षा गरेका थिए। दुबै देशहरुबीच संयुक्त राष्ट्र संघमा आपसी समन्वय कायम राख्ने सहमति भएको थियो।