काठमाडौँ । सरकारले दशैंमा घर जानका लागि अनलाइनबाट टिकट काट्ने यात्रुहरूलाई एक लिटर पानीकाे बाेत्तल सित्तैमा दिने बताएकाे छ ।

आइतवार सिंहदरबारमा बसेको विकास तथा प्रविधि समितिको बैठकमा यातायात व्यवस्था विभागमा महानिर्देशक नमराज घिमिरेले दशैँमा टिकट वितरण गर्न धेरै बिचौलिया देखापर्ने समस्या रहेको भन्दै यस्तो बताएका हुन्।

‘अनलाइन र माेबाइलबाट टिकट बुकिङ गर्न अनुराेध गरिएको छ,’महानिर्देशक घिमिरेले भने, ‘यो वर्ष अनलाइनबाट टिकट काटेर आउने यात्रुलाई एक लिटर पानीकाे व्यवस्था गरेका छौं।’

यस्तै, निर्देशक घिमिरेले टिकट काउन्टरमा बसेकाहरूलाई परिचय पत्र र तोकिएको पोसाक उपलब्ध गराउने बताए । उनले काउन्टरमा रहेका पोसाक लगाउने र परिचय पत्र भएका व्यक्तिहरूबाट मात्रै टिकट काट्न पनि आग्रह गरे।

सरकारले भाेलि साेमवारदेखि दशैँका लागि मध्यम तथा लामाे दुरीकाे सार्वजनिक सवारीकाे अग्रिम टिकट बुकिङ खुला गर्ने निर्णय गरेको छ ।