काठमाडौँ । महानगरीय अपराध महाशाखाले वैदेशिक रोजगार न्यायाधिकरण इजलासबाट २ बर्ष कैद र दुई लाख जरिवाना ठहर भइ फरार रहेका एक अभियुक्तलाई पक्राउ गरेको छ ।

पक्राउ पर्नेमा काठमाडौँ चाबहिल बस्ने ४८ बर्षीय संजय बानियाँ रहेका छन् । बानियाँलाई पाँचथर फलैचा-७ घर भइ हाल झापा बस्ने सुकराज बेघाको जाहेरीको आधारमा पक्राउ गरिएको महाशाखाले जनाएको छ।

महाशाखाका अनुसार बानियाँलाई मिति २०७८ मङ्सिर २७ गतेको फैसलाले विगो र हर्जाना तीस लाख रकम जाहेरवालालाई भराई २ बर्ष कैद र दुई लाख जरीवाना हुने ठहर गरेको थियो।

अदालतको फैसलापछि फरार रहेका बानियाँलाई महाशाखाबाट खटिएको विषेश टोलीले आइतबार दिउँसो साँढे २ बजे दरबारमार्गबाट पक्राउ गरेको हो।

उनलाई फैसला कार्यान्वयनको लागि आजै जिल्ला अदालत काठमाडौँमा पठाइएको महाशाखाले जनाएको छ।