काठमाडौं । चेक चोरेर २ करोड २९ लाख रुपैयाँ निकाल्न लागेका सुभास भेटवाल पक्राउ परेका छन् । प्रहरी वृत्त बौद्धको टोलीले उनलाई बिहीबार दिउँसो पक्राउ गरेको हो ।

भेटवाललाई आपराधिक विश्वासघातको कसुरमा पक्राउ गरिएको काठमाडौं प्रहरी परिसरले जनाएको छ । उनी आपराधिक विश्वासघातको कसुरमा पक्राउ पूर्जी जारी भएपछि फरार हुँदै आएका थिए।

जुवा खालमा चेक चोरेर विभिन्न मिति उल्लेख गरी २ करोड २९ लाख रुपैयाँ भरेको र रकम हत्याउन खोजिएको भन्दै सिन्धुलीका राजकुमार बरालले उजुरी दिएका थिए ।

सोही प्रकरणमा उनीविरुद्ध आपराधिक विश्वासघातको कसुरमा पक्राउ पूर्जी जारी भएको थियो । गत असोजमा जाहेरवाला बराल, भेटवालसहितका व्यक्ति तास खेलेका थिए।

रक्सी खाँदै तास खेल्दा आफ्नो सात थान चेक हराएको भन्दै बैंकमा ब्लक गराएका थिए।