सुनसरी । सुनसरी क्षेत्र नम्बर ३ मा नेकपा एमालेकी भगवती चौधरीको विजयी र्‍यालीमा एमाले र कांग्रेसका कार्यकर्ताबीच झडप भएको छ । एमालेले विजय जुलुस निकाल्ने क्रममा दुई पक्षबीच झडप हुँदा १२ जनाभन्दा बढी घाइते भएका हुन् ।

सुनसरी प्रहरीका अनुसार दुहबी नगरपालिका वडा नम्बर ९ का वडाध्यक्षको घर नजिक विजय र्‍यालीमा अबिर लगाउने क्रममा कांग्रेसका कार्यकर्तालाई लागेर विवाद हुँदा झडप भएको हो ।

कांग्रेस र एमालेका कार्यकर्ताबीच ढुंगा हानाहानको स्थिति आएको थियो । झडपका क्रममा दुई पक्षकै गरेर १२ जनाभन्दा बढी घाइते भएका छन् ।

घाइतेहरूको स्थानीय अस्पतालमा उपचार भइरहेको र उनीहरुको अवस्था सामान्य रहेको प्रहरीले जनाएको छ ।