एजेन्सी । चिनियाँ प्रधानमन्त्री ली खछ्याङले मङ्गलबार बेइजिङमा इस्लामिक गणतन्त्र इरानका राष्ट्रपति इब्राहिम रायसीसँग भेटवार्ता गरेका छन् ।

सो अवसरमा प्रधानमन्त्री लीले चीन र इरान दुवै प्राचीन सभ्यता भएको र आफ्ना जनताबीच मैत्रीपूर्ण भावना र विचार आदानप्रदानको लामो इतिहास रहेको बताएका छन् ।

चीनले चीन-इरान सम्बन्धको विकासलाई ठूलो महत्त्व दिएको र इरानसँग पारस्परिक सम्मान र समान व्यवहार गर्न इच्छुक रहेको उनको धारणा छ।

चीनले इरानसँग व्यावहारिक सहयोगको स्तर सुधार गर्ने दिशामा काम गर्न इच्छुक रहेको पनि बताउँदै लीले चीन-इरान बृहत् सहयोग योजना कार्यान्वयन गर्न, अर्थतन्त्र, व्यापार र अन्य क्षेत्रमा सहयोग प्रवर्द्धन गर्न, उत्पादन निर्यातलाई पारस्परिक रूपमा विस्तार गर्न र त्यसको कार्यान्वयनलाई प्रवर्द्धन गर्न दुवै पक्षलाई आह्वान गरेको छ ।

जनताको जीविकोपार्जनमा सुधार गर्न, कर्मचारी आदानप्रदान बढाउन र दुई देशबीचको मित्रताको जनस्तरमा सुदृढ पार्ने पारस्परिक लाभकारी परियोजनाहरू अगाडि बढाउन पनि काम गर्ने उनले उल्लेख गरेका छन् ।

इरान र चीनबीचको मित्रतालाई उजागर गर्दै रायसीले इरान चीनसँगको सम्बन्ध थप विकास गर्न प्रतिबद्ध रहेको पनि बताए । मंगलवारमात्र इरानी राष्ट्रपति इब्राहिम राइसी आफ्नो तीन दिने चीन भ्रमणका क्रममा बेइजिङ पुगेका छन् । इरानी राष्ट्रपतिको यो चीन भ्रमण इरानबाट २० वर्षपछि भएको राष्ट्रपतिस्तरीय राजकीय भ्रमण हो।

पछिल्लो समय अमेरिका र चीन बीच कुटनीतिक तथा सुरक्षा टकराब बढ्दै गएको छ। अमेरिकी आकासमा पुगेको चिनियाँ बेलुनलाई अमेरिकी सेनाले ुस्पाइ बेलुनु भन्दै खसालेपछि दुई देशबीच कुटनीतिक तिक्तता बढ्दै गएको छ।