ललितपुर । ललितपुरमा ‘लम्पी स्किन’ संक्रमण बढ्दो क्रममा देखिएको छ । झिङ्गा, लामखुट्टेका टोकाइबाट पशुमा सर्ने संक्रमण ललितपुरमा फैलिँदै गएको हो ।

भेटेनरी अस्पताल तथा पशु सेवा विज्ञ केन्द्र ललितपुरका डा. निशा तिमिल्सिनाका अनुसार ललितपुरमा वैशाखदेखि साउन १६ गतेसम्ममा एक हजार ४३१ पशु संक्रमित भएका छन् । संक्रमितमध्ये ७२ भैँसी र ११ गाई मरिसकेका छन् । उनका अनुसार संक्रमण बढ्दो क्रममा रहेको छ ।

केन्द्रले थप क्षति नहोस् भनेर सजगता अपनाएको जानकारी दिँदै उनले जिल्लाभरमा आठ हजार तीन सय गाईभैँसीलाई ‘लम्पी स्किन’ विरुद्धको खोप लगाइसकेको बताए । गोदावरी नगरपालिकामा मात्र पाँच हजार गाईभैँसीलाई खोप लगाएको छ भने यहाँ संक्रमित संख्या २९६ पुगेको छ ।

“उपत्यकामा कूल संक्रमित पशुको संख्या १२ हजार ८७३ पगेको छ”, डा। निशाले भने, “गाईभैँसी संक्रमणमुक्त एक हजार १७ छन् भने मर्नेको संख्या १७४ पुगेको छ ।” उपत्यकाभरका १७ हजार ९८८ गाईभैँसीलाई खोप लगाइसकेको उनले बताए । रासस