काठमाडौं । नेपाल राष्ट्र बैंकले पटक पटक नीतिगत व्यवस्था पालना नगरेका तीन वटा बैंकलाई कारबाही गरेको छ ।

आर्थिक वर्ष २०७९/८० को चौंथो त्रैमासमा तीनवटा वाणिज्य बैंकलाई कारबाही गरेको हो । बैंक तथा वित्तीय संस्थासम्बन्धी ऐनरकानुन पालना नगरेको भन्दै राष्ट्र बैंकले प्राइम कमर्सियल, कुमारी र हिमालयन बैंकलाई कारबाही गरेको हो ।

प्राइम कमर्सियल बैंकले कायम गर्नुपर्ने कर्जा नोक्सानी व्यवस्था कायम नगरेको र जोखिम भारित सम्पत्ति गणना गर्दा वास्तविकभन्दा कम गरेको बैंकले जनाएको छ । यस्तै कानुन विपरीत प्रिमियम दर बढाई ब्याज असुल गरेकाले प्राइम बैंकका प्रमुख कार्यकारी अधिकृतलाई सचेत गराइएको सूचनामा उल्लेख छ ।

साथै गएको माघमा कर्जा–निक्षेप अनुपात कायम नगरेको कुमारी बैंकलाई ५९ लाख ६३ हजार ६ सय ९४ रुपैयाँ तथा कात्तिकमा कर्जा–निक्षेप अनुपात कायम नगरेको हिमालयन बैंकलाई एक करोड ३९ लाख ४७ हजार २८ रुपैयाँ जरिबाना गरिएको बैंकले जनाएको छ ।

प्राइम र कुमारी बैंक पहिलो पटक कारबाही परेका हुन् भने हिमालयनलाई दोस्रो पटक कारबाही गरिएको सूचनामा उल्लेख छ ।

आ.व. २०७९-८० को चौथो त्रयमासमा ‘क’ वर्गका वाणिज्य बैंक र बैंकका अध्यक्ष, सञ्चालक र प्रमुख कार्यकारी अधिकृतलाई गरिएको कारबाही ।https://t.co/bEr2p2cGCz pic.twitter.com/9iqpPOplIX

— Nepal Rastra Bank (@NepalRastraBank) August 7, 2023