कैलाली । नेपाल राष्ट्र बैंक धनगढीका निर्देशक विनोद लेखकले ढुकुटीको सिल तोडेको खुलेको छ ।

तीन साताअघि नेपाल राष्ट्र बैंक धनगढीको ढुकुटीमा लगाइएको सिल तोडेको भेटिएपछि अनुसन्धानको लागि केन्द्रीय कार्यालय काठमाडौँको टोली खटिएको थियो ।

सो अनुसन्धान टोलीले बिहानको समयमा बैंकको ढुकुटीमा पुगेर ढोकामा लगाएको ‘सिल’ तोडेर लेखक नै फर्किएको निष्कर्ष निकालेको हो ।

कञ्चनपुरको महेन्द्रनगर घर भएका लेखकलाई कारबाही स्वरुप काठमाडौं सरुवा गरिएको छ । उनलाई राष्ट्र बैंक केन्द्रीय कार्यालयको मानव संसाधन विभागमा अतिरिक्त समूह अन्तर्गत जिम्मेवारीविहीन अवस्थामा राखिएको छ ।

अहिले राष्ट्र बैंक धनगढीको निमित्तको जिम्मेवारी शान्ति पाण्डेलाई दिइएको छ । ढुकुटीमा सिल भएको स्थानमा पुग्ने र लाहा छापसहित सिल तोड्ने अधिकार सीमित व्यक्तिलाई मात्र हुन्छ । ढुकुटीका ढोकामा समेत तीनवटा ताल्चा लगाइएको हुन्छ ।