अर्घाखाँची । अर्घाखाँचीमा चट्याङ लागेर २० वर्षीय मिलन खनालको मृत्यु भएको छ ।
जिल्लाको मालारानी गाउँपालिका ९ गोखुंगास्थित सेपानी गाउँका खनालको अर्घाखाँची अस्पतालमा लैजाँदै गर्दा बाटैमा मृत्यु भएको हो ।
चट्याङबाट चार जना घाइते भएका छन् । सोही गाउँका २२ वर्षीय दामोदर खनाल, २५ वर्षीय जेमबहादुर पुन, २१ वर्षीय चन्दबहादुर पुन र २८ वर्षीय लिलबहादुर पुन सिकिस्त घाइते भएको स्थानीयहरूले बताएका छन् ।
घाइते चारै जनाको अर्घाखाँची अस्पतालमा उपचारपछि थप उपचारका लागि प्रादेशिक अस्पताल बुटवल रिफर गरिएको जिल्ला प्रहरी कार्यालय अर्घाखाँचीले जनाएको छ ।
दिउँसो बजारमा गएका उनीहरू घर फर्कँदै गर्दा पानी परेपछि स्थानीय दुर्गाबहादुर पुनको घरमा ओत लागेर बसेका बेला चट्याङ परेको थियो ।
Leave a Reply