रौतहट । रौतहटमा छुरा प्रहारबाट एक युवकको मृत्यु भएको छ । जिल्लाको कटहरिया नगरपालिका– ५ मा शुक्रबार राति २५ वर्षीय सनीलराय यादवको छुरा प्रहारबाट मृत्यु भएको हो ।

कटहरियास्थित खानेपानी कार्यालय छेउमा यादवका दाजुभाइ र अर्को पक्षबीच भनाभनपछि हात हालाहाल भएको थियो । झडपका क्रममा यादवको देब्रे कोखामा छुरा प्रहार भएको प्रहरीले जनाएको छ ।

घाइते अवस्थामा भुईंमा लडेर अचेत भएपछि स्थानीयले उपचारका लागि प्राथमिक स्वास्थ्य केन्द्र कटहरिया लगेका थिए । त्यहाँ चिकित्सकले उनलाई मृत घोषणा गरेको जिल्ला प्रहरी कार्यालय रौतहटले जनाएको छ ।

घटनामा संलग्न रहेको आरोपमा प्रहरीले कटहरिया– ५ का बद्री साह सोनार र उनका काका किसन साहलाई पक्राउ गरेको छ । घटनाबारे प्रहरीले थप अनुसन्धान थालेको छ ।