काठमाडौं । नागरिक उन्मुक्ति पार्टीका नेता रेशम चौधरीलाई जेलमा सहयोग गर्दा एक उपसचिवले मन्त्रीको स्वकीय सचिवको जिम्मेवारी पाएका छन् । उपसचिव बसन्तराज पुरी हाल भुमी व्यवस्था मन्त्री रन्जिता श्रेष्ठ चौधरीको स्वकीय सचिवको जिम्मेवारीमा छन् ।
डिल्लीबजार कारागारको जेलर हुँदा रन्जिताका श्रीमान रेशमलाई सहयोग गरेबापत उनले यो अवसर पाएका हुन् । पुरी गत वर्ष डिल्लीबजार कारागारको जेलर थिए । त्यसबेला रेशम त्यही थुनामा थिए । जेलभित्र सहज वातावरण बनाइदिनेदेखि भेटघाटमा पुरीले सहजीकरण गरिदिएका थिए ।
त्यही कारण रन्जिताको उनको चिनजान भएको हो । त्यतीबेला सहयोग गरेबापत रन्जिताले पुरीलाई आफ्नो सचिवालयमा राखेका हुन् । रवि लामिछाने गृहमन्त्री हुँदा पुरी लमजुङको सिडिओ बनेका थिए । तर, नारायणकाजीले तीन महिनामै ताने । त्यसपछि पुरी रन्जिताको सचिवालयमा बसेका हुन् ।
तर, मन्त्रालयमा उनको भूमिका भने राम्रो नभएको कर्मचारीहरु बताउँछन् । कर्मचारी सरुवामा पुरीले नै सूची बनाउने गरेको मन्त्रालय स्रोत बताउँछ । खासगरी मालपोत र नापीका कर्मचारीको सरुवामा चलखेल हुँदै आएको छ ।
जसमा मन्त्रीको सचिवालय मुछिएको छ । धेरै जसो सरुवा आर्थिक चलखेलका आधारमा भएको एक कर्मचारी बताउँछन् । डिल्लीबजार कारागारमा हुँदा पनि जेलभित्र डनतन्त्र चलाएकोमा उनी आलोचित बनेका थिए ।
Leave a Reply