काठमाडौं । जिल्ला इन्चार्जबाट हटाइएका दुई प्रहरी उपरीक्षक (एसपी) माथि प्रहरी प्रधान कार्यालयले थप छानविन र कारबाही गर्ने भएको छ । सिराहाबाट तानिएका एसपी सन्तोष आचार्य तथा इलामबाट तानिएका वासुदेव खतिवडामाथि थप छानविन हुन लागेको हो ।
दुवैले आचरणविपरीत गम्भीर गल्ती गरेको भेटिएपछि हटाइएको थियो । एसपी आचार्यले बिचौलिया तथा मिटरब्याजी नरेश साहसँग पैसा लिँदै आएको पुष्टि भएको छ ।
प्रहरी प्रधान कार्यालयबाट खटिएको टोलीले साहलाई पक्राउ गरी छानविन गर्दा आर्थिक कारोबार पुष्टि भएको थियो । उनले एसपीलाई आफूले पैसा बुझाउने गरेको समेत स्वीकार गरेका छन् । जसकारण एसपी आचार्यमाथि विभागीय कारबाही समेत हुने सम्भावना रहेको एक उच्च प्रहरी अधिकारीले बताए ।
त्यस्तै, इलामबाट तानिएका एसपी खतिवडाले राष्ट्रिय अनुसन्धान विभागका एक कर्मचारीको श्रीमतीसँग अनुचित सम्बन्ध राख्दै आएको खुलेको छ । प्रहरी आचरणविपरीतको गतिविधिमा संलग्न भएकाले उनीमाथि पनि विभागीय कारबाही समेत हुने स्रोत बताउँछ ।
Leave a Reply