काठमाडौं । नेकपा एमालेका नेता महेश बस्नेत सवार गाडिमा आक्रमणको प्रयास गर्ने नेपाल विद्यार्थी संघ (नेविसंघ) का कार्यकर्तामाथि नेविसंघले नै कारबाही गर्ने भएको छ ।
नेविसंघका सभापति दुजाङ शेर्पाले विराटनगरमा एमाले नेता बस्नेतमाथि आक्रमण गरेर संगठनको नाम दुरुपयोग गर्नेमाथि कडा कारबाही गरिने प्रष्ट पारेका हुन् ।
बस्नेतको गाडीमा रातो मसी छ्याप्ने सन्जोग गौतम र अर्पित कुँवर महेन्द्र मोरङ क्याम्पसका नेविसंघका नेताहरू हुन् ।
संगठनको नाम दुरुपयोग गर्नेहरूलाई कडा कारबाही गरिने भन्दै शेर्पाले बस्नेतमाथि मसी छ्याप्ने कायरता नेविसंघको नभएको समेत वक्तव्यमार्फत प्रष्ट पारेका छन् ।
वक्तव्यमा शेर्पाले भनेका छन्–‘नेकपा एमाले र अखिलसँग हाम्रो सयौँ विमतिहरू छन् । लोकतन्त्रमा विरोध सबैको अधिकार हो तर आज विराटनगरमा महेश बस्नेतमाथि रातो मसी छ्याप्ने कायरता नेविसंघको होइन। संगठनको नाम दुरुपयोग गर्नेहरूलाई कडा कारबाही गरिन्छ ।’